ՀՀ փոխվարչապետ, տարածքային կառավարման նախարար Արմեն Գեւորգյանը եղել է Մարտունի քաղաքում ու Ծովասար գյուղում եւ ծանոթացել միջհամայնքային ճանապարհի 7 կմ հատվածի նորոգման աշխատանքների ընթացքին: Ծրագիրը իրականացվում է Ասիական զարգացման բանկի միջոցներով։ Իսկ ահա ծագումով մարտունեցի, ռուսաստանաբնակ եղբայրների՝ «ԲԱՄՕ» ընկերության միջոցներով Ծովասարում 500 աշակերտական տեղով նոր դպրոց է կառուցվում, հիմնանորոգվում է գյուղի մշակույթի տունը: Ծրագրերի ավարտը՝ այս տարվա սեպտեմբերին։ Գյուղը խմելու ջրի խնդիր ունի, եւ Արմեն Գեւորգյանը խոստացել է զբաղվել այս հարցով, իսկ «ԲԱՄՕ»-ն նորոգում է գյուղի խմելու ջրագիծը: Մարտունեցիք ավանդաբար եւ ընտանիքներով մեկնում են արտագնա աշխատանքի: Ճգնաժամի արդյունքում մեկնողների թիվը նվազել է, սակայն «ԲԱՄՕ»-ի ծրագրերը մոտ 250 հոգու աշխատելու հնարավորություն են տվել:
Վերջում Արմեն Գեւորգյանը մարտունե ցիներից պահանջել է այն, ինչ պահանջում է գրեթե բոլոր համայնքներից՝ ապահովել սեփական եկամուտների հավաքագրման բարձր ցուցանիշներ:
