![\"\"](\"https://www.aravot.am/2009/aravot_arm/October/13/p19.jpg\")
Շաբաթ երեկոյան մինչեւ 50,8 կգ քաշային կարգում աշխարհի չեմպիոն Սյուզի Կենտիկյանը Գերմանիայի Ռոստոկ քաղաքի ռինգում գերմանաբնակ թրքուհի Յուլիա Սահինի հետ մենամարտում ոչ միայն հերթական անգամ պաշտպանեց կանանց պրոֆեսիոնալ բռնցքամարտում WBA/WIBF վարկածներով իր գոտիները, այլեւ նվաճեց WBO-ի թափուր տիտղոսը:
Դեռ նախապատրաստական փուլի եզրափակիչ մարզումների ժամանակ Սյուզին կասկած չուներ, որ հաղթելու է: Իսկ Երեւանից մեկնելուց հետո, երբ արդեն Գերմանիայում էր, մեզ հետ հեռախոսազրույցի ժամանակ ասում էր, որ ցանկանում է մարտը ժամանակից շուտ ավարտել: Ճիշտ է, նա մրցավարների միաձայն որոշումով հաղթեց միավորներով՝ 98:92, 96:94, 97:93, սակայն չմոռանանք, որ նա, ինչպես եւ Վախթանգ Դարչինյանը, վերջին մարտերում հանդիպում է միայն չեմպիոնների կամ առաջին համարների հետ՝ հանգամանք, որի պարագայում մրցակցին նոկաուտի ենթարկելն անհամեմատ ավելի դժվար է:
Հաղթանակը, թող լինի միավորներով, միեւնույն է, պատվաբեր է, մանավանդ, որ դրանից հետո արդեն սեփականաշնորհած տիտղոսներին ավելանում է եւս մեկը՝ թեկուզ թափուր գոտու տեսքով:
Սյուզիի հետ հարցազրույց անպայման կաշխատենք կազմակերպել: Բայց վստահ ենք, որ նրա համար իր մարզական կենսագրության 26-րդ մենամարտը եւ 26-րդ հաղթանակը Յուլիա Սահինի նկատմամբ առանձնակի նշանակություն ունի:
