Ըստ a1plus.am-ի, մշակույթի նախարար Հասմիկ Պողոսյանը հակված է ստորագրել Կամերային նվագախմբի գեղարվեստական ղեկավար եւ տնօրեն Արամ Ղարաբեկյանի հրաժարականի դիմումը, ինչի առիթով նա մայիսի 5-ին հանդիպել է այս հարցով շահագրգիռ մարդկանց, այդ թվում՝ Կոմպոզիտորների միության նախագահ Ռոբերտ Ամիրխանյանի հետ:
Մշակույթի նախարարության հասարակայնության հետ կապերի բաժնի պետ Գայանե Դուրգարյանը լուրի առնչությամբ պարզաբանեց, որ նախարարն այս օրերին Գյումրիում է, հետեւաբար հատուկ հանդիպում Ղարաբեկյանի «թեմայով» չէր կարող լինել: Մշակույթի նախարարի մամուլի քարտուղար Մարգարիտա Գրիգորյանից եւս հետաքրքրվեցինք՝ նախարարն իսկապե՞ս ընդունել է Կամերային նվագախմբի ղեկավարի հրաժարականը: Նա էլ նշեց, որ այս պահին ոչինչ ասել չի կարող, քանի որ Հ. Պողոսյանի բջջայինն արդեն քանի ժամ է՝ «անհասանելի» է եւ հնարավոր չէ կապվել նրա հետ:
