![\"\"](\"https://www.aravot.am/2010/aravot_arm/May/8/p12.jpg\")
Թբիլիսիի քաղաքապետի ընտրություններում՝ որպես թեկնածու առաջադրված Վրաստանի պահպանողական կուսակցության առաջնորդ Զվիադ Ձիձիգուրին (նկարում) նախորդ գիշեր զենքով սպառնացել էր երկրում իշխող՝ «Ազգային շարժում» կուսակցության ակտիվիստներին, որոնք իր տան պատերին իրենց կուսակցության քարոզչական պաստառներն են փակցրել: «Newsru»-ի մատուցմամբ, սկզբում վրդովված Ձիձիգուրին սահմանափակվել է միայն վիրավորանքներով, բայց հետո լեզվակռիվը վերածվել է ծեծկռտուքի եւ ավարտվել ատրճանակից օդ արձակված կրակոցներով: Միջադեպի մասնակիցները պնդում են, որ իրենք թեկնածուին չեն սադրել, այլ իրենց պաստառները հանգիստ փակցրել են տան պատերին: Ձիձիգուրին վիրավորել է նաեւ դեպքի վայր ժամանած լրագրողներին եւ նրանց տնից դուրս է վռնդել: Վրաստանի դատախազությունը միջադեպի կապակցությամբ հետաքննություն է սկսել, իսկ Ձիձիգուրին երեկ մամուլի ասուլիս է հրավիրել եղելության իր վարկածը լրագրողներին եւ հասարակությանը ներկայացնելու համար:
