«Ժառանգություն» խմբակցության քարտուղար Լարիսա Ալավերդյանը Հարավային Կովկասի վերաբերյալ մայիսի 20-ին Եվրախորհրդարանի ընդունած թիվ 2216 բանաձեւը «Արմատ» ակումբում երեկ բնորոշեց որպես «անգրագետ փաստաթուղթ», միաժամանակ ընդգծելով, որ, այդուհանդերձ, քաղաքական ցանկացած այդ տիպի որոշում բացասական է ազդում թե՛ բանակցությունների գործընթացի, թե՛ վերջնական լուծումների վրա:
Հայ-թուրքական գործընթացի վերաբերյալ Լ. Ալավերդյանն ընդգծեց, որ Հայաստանի իշխանությունները դեռ որեւէ քայլ չեն արել հայ-թուրքական արձանագրությունները շտկելու, փոփոխելու կամ դրանք մի կողմ դնելու ու գործընթացը մաքուր էջից սկսելու ուղղությամբ:
Պատգամավորն ափսոսանք հայտնեց, որ Արցախի հարցում նույնպես Հայաստանի իշխանությունները պատահական կամ հազվագյուտ դեպքերում են օգտագործում իրավական փաթեթի այս կամ այն արտահայտությունը: Օրինակ, ըստ Լարիսա Ալավերդյանի, նախկին նախագահ Ռոբերտ Քոչարյանի եւ գործող նախագահ Սերժ Սարգսյանի կողմից օգտագործվել է «Արցախը կայացել է երբեւիցե Ադրբեջանին չպատկանող տարածքների վրա» արտահայտությունը: «Սակայն ես չեմ տեսել, որ նման արտահայտություններն արտացոլվեն իրական քաղաքականության մեջ»,- ասաց նա: Իսկ փոխզիջման գաղափարը, Լարիսա Ալավերդյանի խոսքերով, բարձրացվում է նույնպես «Հայաստանի դիվանագիտական, քաղաքական, պետական մտքի եւ գործի պասիվության պատճառով»:
Նա դրական գնահատեց ԼՂՀ-ում խորհրդարանական ընտրությունների անցկացման կապակցությամբ ԵԱՀԿ Մինսկի խմբի համանախագահների հայտարարության հետեւյալ հատվածը. «Համանախագահները հասկանում են դե ֆակտո գոյություն ունեցող իշխանությունների համար ժողովրդավարական ձեւով հանրային կյանքը կազմակերպելու անհրաժեշտությունը»: Պատգամավորի կարծիքով, դա նշանակում է, որ երեք խոշոր պետությունների՝ ԱՄՆ-ի, Ռուսաստանի եւ Ֆրանսիայի իշխանությունները եւս հասկանում են նման անհրաժեշտությունը:
Լարիսա Ալավերդյանը հայտարարեց, որ «Ժառանգությունը» մնում է Րաֆֆի Հովհաննիսյանի՝ դեռեւս 1992թ.-ից որդեգրած այն դիրքորոշմանը, որ Հայաստանը պետք է սկսի ԼՂՀ ճանաչման գործընթաց: «Ժառանգությունը» պնդում է այս հարցով խորհրդարանական լսումներ անցկացնելու իր նախաձեռնությունը:
