Երեկ «Նարեկացի» արվեստի միության ցուցասրահի պատերը զարդարված էին 24-ամյա Անահիտ Հայրապետյանի լուսանկարներով: Նրա առաջին անհատական ցուցահանդեսում ներկայացվեց Արցախի բնությունն ու եկեղեցիները պատկերող շուրջ 20 լուսանկար:
Մեզ հետ զրույցում Անահիտը պատմեց. «Նկարների մի մասը լուսաբացին, մյուս մասը՝ մայրամուտին են արված: Իմ երազանքն ու ցանկությունն է, որ Արցախը միշտ լուսաբացով լինի ու քաղաքական առումով երբեք մայրամուտ չտեսնի»: Լուսանկարչի խոսքով, վերջին շրջանում ղարաբաղյան հարցը հայ եւ միջազգային հանրության ուշադրության կենտրոնում է, եւ պատահական չէ, որ հենց այս օրերին ինքը նախաձեռնեց արցախյան թեմայով ցուցահանդես. «Այս ցուցահանդեսին մի խումբ երեխաներ էին եկել ու ինձ հարցնում էին՝ Իտալիայո՞ւմ եք ֆիքսել այս պատկերները՝ Արցախը Իտալիայի հետ էին համեմատում: Արցախի գանձերը պետք է ցուցադրենք ու ներկայացնենք միջազգային հանրությանը»:
