ՀՀ համայնքների ասոցիացիայի համակարգող, Եվրոպայի խորհրդի տեղական եւ տարածքային իշխանությունների կոնգրեսի փոխնախագահ Էմին Երիցյանը երեկ լրագրողների հետ հանդիպմանը հայտարարեց, որ 1996 թվականին Հայաստանում ներդրված տեղական ինքնակառավարման համակարգը բարեփոխելու գործողությունների ծրագիր է ընդունվել եւ իրականացվում է 2002 թվականից, սակայն մեր ավագանու ինստիտուտը դեռ թույլ է, իսկ համայնքների ֆինանսական հնարավորությունները՝ սահմանափակ: Դրական տեղաշարժեր էլ են եղել: Օրինակ, ի տարբերություն 90-ականների, պետությունը չի ուշացնում համայնքների դոտացիաները, պետությունը չի կարող տեղի-անտեղի վաղաժամկետ դադարեցնել համայնքապետի լիազորությունը, Սահմանադրությամբ եւ «Տեղական ինքնակառավարման մասին» օրենքով ուժեղացվել է ՏԻՄ-երի ինքնուրույնությունը: Այսօր մեր ՏԻՄ համակարգը, որպես քաղաքական ինստիտուտ, ավելի լավն է, քան նախկին խորհրդային եւ արեւելաեվրոպական երկրներինը, օրինակ, լավն է լեհական, չեխական ՏԻՄ-երից, հայտարարեց բանախոսը:
Հայաստանում ՏԻՄ բարեփոխումների միակ ուղղությունը, ուր գործնականը քիչ է, ու քննարկումները շարունակվում են՝ համայնքների խոշորացումն է: Ըստ Էմին Երիցյանի՝ խոշորացումը չի կարող զանգվածային լինել, իսկ գործընթացի ավարտին այսօրվա մոտ 900 համայնքից կմնա մոտ 800-ը:
