Եվրոպական լիբերալ դեմոկրատական եւ բարեփոխումների կուսակցությունը արձագանքել է այս տարվա մարտից իր լիիրավ անդամը հանդիսացող Հայոց համազգային շարժման՝ հուլիսի 17-ին եվրոպական այդ կուսակցությանն ուղղված նամակին՝ ՀՀ իշխանություններին կոչ անելով «անհապաղ ազատ արձակել բոլոր քաղբանտարկյալներին»: «Ազատություն» ռ/կ-ի մատուցմամբ, կուսակցության նախագահ Էննեմի Նեյթս-Յութթերբրոքի հայտարարության մեջ, որը տեղադրված է Եվրոպական լիբերալ դեմոկրատական եւ բարեփոխումների կուսակցության պաշտոնական կայքէջում, ասված է. «Հայաստանը, լինելով Եվրախորհրդի անդամ երկիր, պետք է անհապաղ ազատ արձակի բոլոր քաղբանտարկյալներին, քանի որ խոսքի ազատությունը եւ համոզմունքների ազատությունը ԵԽ հիմնարար արժեքներից են: Քաղաքական դրդապատճառներով մարդկանց բանտում պահելը եւ նրանց արդար դատաքննության իրավունքից զրկելը հակասում են Եվրախորհրդի անդամ երկրների հիմնարար պարտականություններին եւ անկասկած կարող են խոչընդոտել Հայաստանի եւ Եվրամիության մերձեցման գործընթացը»:
ՀՀՇ վարչության նախագահ Արամ Մանուկյանը պարզաբանել է, թե այդ եվրոպական կուսակցությանն ուղղված նամակում «մենք գրել ենք, որ եթե դուք ցանկանում եք, որ հայ հասարակությունը հավատա եվրոպական արժեքներին եւ ժողովրդավարության արժեքներին, ապա ձեր գործունեությամբ չպետք է հայ հասարակությանը հիասթափության մատնեք: Մենք եվրոպական երկրների շարքում ենք եւ պարտավոր ենք ապրել եվրոպական երկրների արժեքներով: Այսինքն՝ ինչքան դա մեր խնդիրն է, նույնքան էլ եվրոպական կառույցների խնդիրն է»: