Նրանց տեղը սպորտն է

Ինչ-որ մեկը ինչ-որ տեղ ասել է. «Կանայք այնքան սեքսուալ ու հիասքանչ են, որ նրանց տեղը միայն սպորտն է»: Այս խոստովանությանը ավելացնելու բան չկա: Կինը սպորտում անկրկնելի է: Մարդիկ, սովորաբար, հիանում են գործող մարզուհիների գեղեցկությամբ: Բայց կա նաեւ մարզաշխարհի հետ անմիջական առնչություն ունեցող կանանց մի նեղ շրջան, որոնցից շատերն իրենց գեղեցկությամբ կհաղթեն անգամ օլիմպիական ու աշխարհի չեմպիոնուհիներին: Խոսքը մարզական, հատկապես՝ հեռուստատեսությունում աշխատող կին լրագրողների մասին է, որոնցից շատերի տեսքն ու ձայնը խանգարում են հետեւել մրցասպարեզներում կատարվող իրադարձություններին: Սակայն հատկապես տղամարդ մարզասերները սրտի խորքում դրանից իրենց լավ են զգում, անգամ հաճույքով են այդպիսի զոհողությունների գնում:
Արտասահմանյան գործակալություններից մեկն ընդհանրապես կին լրագրողների ամենագեղեցիկ տասնյակը որոշելու փորձ է արել, որի արդյունքում ցուցակում տեղ են գտել հիմնականում մարզական կին լրագրողները: Ցուցակը գլխավորել է մեքսիկական հեռուստաընկերություններից մեկում մարզական բաժինը վարող Ինես Սայսը, որը շաբաթ օրերն ամփոփում է անցած յոթ օրերի կարեւոր մարզական իրադարձությունները: Սայսի կատարյալ մարմինը նրան հեռուստաաստղ է դարձրել եւ նրա հաղորդումները բազմամիլիոն ակնդիրներ են հավաքում էկրանների առջեւ: Հմայքով Սայսին չեն զիջում նաեւ տասնյակ ընդգրկված մյուս գեղեցկուհիները: