Արթուր Աբրահամ. «Ֆրոչին Միրանդայի ճակատագիրն է սպասվում»

Երեք օր մնաց երկրորդ միջին քաշային կարգում «Super Six Boxing World Classic» մրցաշարում աշխարհի նախկին չեմպիոններ, առաջին միջին քաշային կարգում՝ Արթուր Աբրահամի (IBF) եւ երկրորդ միջինում՝ Կարլ Ֆրոչի (WBC) մենամարտին:
Այս դիմակայությունը դասվում է անցնող տարում ամենասպասվածների շարքը եւ իր առաջացրած հետաքրքրությամբ, գուցե, գերազանցում է նաեւ Աբրահամ-Միրանդա մենամարտին: Բուքմեյքերները նոյեմբերի 27-ին Հելսինկիի ռինգում կայանալիք այդ մրցակցությունում, որի ժամանակ խաղարկվելու է նաեւ երկրորդ միջին քաշային կարգում WBC-ի չեմպիոնի թափուր տիտղոսը, գերադասում են Աբրահամի հնարավորությունները՝ նրա հաղթանակի դեպքում 1,7-ի դիմաց դնելով անգլիացու հաղթանակի 2,1 գործակից:
Արթուր Աբրահամը նոյեմբերի 20-ին ժամանել է Ֆինլանդիայի մայրաքաղաք, որտեղ էլ շարունակում է նախապատրաստությունը: Հելսինկիում նրան անհամբերությամբ են սպասել եւ, ըստ ամենայնի, «Hartwall Areena» մարզահամալիրի տրիբունաներն զբաղեցնող մարզասերներն աջակցելու են Աբրահամին: Եվ նրանք դրա համար բավարար հիմնավորում ունեն, քանի որ Կարլ Ֆրոչը օրերս անհարգալի արտահայտություններ է արել Ֆինլանդիայի եւ ֆինների հասցեին:
Ֆիննական լրատվամիջոցները Արթուրի ժամանելուն պես հարցազրույցներ են ունեցել նրա հետ, որոնց՝ Աբրահամի պատասխանները ներկայացնում ենք հատվածաբար: Գնահատելով Ֆրոչի՝ ֆիններին եւ նրանց երկրի հասցեին ասածները, հայ գերմանացին ասել է. «Ես զարմացած եմ: Անդաստիարակություն է՝ վատ արտահայտվել այն երկրի մասին, որտեղ դու հյուր ես: Բայց բոլորը գիտեն, որ նա աջ ու ձախ ճամարտակում է: Եկեք սպասենք, թե նա ինչ կասի մենամարտից հետո, երբ ես նրան ոչնչացրած կլինեմ: Թեեւ վստահ եմ, որ ամեն կերպ արդարացումներ կփորձի գտնել, ճիշտ այնպես, ինչպես վարվեց Կեսլերին պարտվելուց հետո:
Իսկ ինչ վերաբերում է նաեւ իմ հասցեին արած վիրավորական արտահայտությունների եւ դրանց՝ ինձ վրա ունեցած ազդեցության մասին, ասեմ, որ ես դրանք, պարզապես, բանի տեղ չեմ դնում: Միակ մարդը, ում հաջողվել է ինձ անհանգստացնել, Էդիսոն Միրանդան է եղել: Բայց դա նրան ոչ մի լավ բանի չբերեց. նախ ես նրան հաղթեցի անգամ կոտրված ծնոտով, ապա նոկաուտի ենթարկեցի ռեւանշ-մրցամարտում: Ֆրոչին, կարծում եմ, նույն ճակատագիրն է սպասվում»:
Աբրահամ-Ֆրոչ հակամարտության հավանական ելքի մասին խոսել են նաեւ անվանի բռնցքամարտիկները: Գերծանր քաշային Նիկոլայ Վալուեւը հայտարարել է, որ մենամարտի օրը ինքը գտնվելու է դահլիճում եւ երկրպագելու է Աբրահամին: Իսկ Միկկել Կեսլերը, ում պարտվել է Ֆրոչը, աշխատել է միանշանակ կանխատեսումներից ձեռնպահ մնալ: Նրա խոսքերով, Աբրահամն անչափ ուժեղ է եւ նա կհաղթի, եթե հենց սկզբից ակտիվություն դրսեւորի եւ գրավի ռինգի կենտրոնը: Հաղթանակի հնարավորություն ունի նաեւ Ֆրոչը, որի արգումենտներն են ֆիզիկական տվյալները՝ բարձր հասակը, մասսան, ձեռքերի երկարությունը եւ շարժունակությունը: «Այնպես որ, մարտը կարող է ցանկացած ելք ունենալ»,- ասել է Կեսլերը: