Հայազգի մարզիկները անցնող տարվա ավարտին հաջող մրցելույթներ են ունենում տարբեր մրցումներում:
Սամբիստ, 51 կգ քաշային Քրիստինե Կարեկյանը հավասարը չունեցավ Ռուսաստանի առաջնությունում: Հաղթելով բոլոր մրցակիցներին՝ նա նվաճեց չեմպիոնի կոչումը եւ անմիջապես հրավիրվեց երկրի հավաքական:
Հունահռոմեական ըմբիշ Շարուր Վարդանյանը, որը ներկայացնում է Շվեդիան, այդ երկրում անցկացված «Haparanda Cup» ամենամյա մրցաշարում պարտվեց միայն ռուսաստանցի Յուրի Դենիսովին եւ արժանացավ բրոնզե մեդալի:
Մեր հայրենակիցները մեդալներ են շահել նաեւ Ուկրաինայի ձյուդոյի առաջնությունում: Այսպես, կանանց մրցաշարում 57 կգ քաշային Շուշաննա Ղեւոնդյանը (Կիեւից) դարձել է երրորդ մրցանակակիր: Նմանատիպ հաջողության է հասել Զապորոժիեի մարզի հավաքականի անդամ Սուրեն Մկրտչյանը: Նա հանդես է եկել 60 կգ քաշային կարգում: Այս տեղեկությունները հաղորդում է sportinfo.am կայքը: