Հռոմի Բենեդիկտոս XVI պապը հայտնել է ամուսնացող շատ կաթոլիկների անբավարար պատրաստվածության մասին: Հովվապետը կոչ է արել խստացնել փեսացուի եւ հարսնացուի համար նախապատրաստական միջոցառումները եւ նրանց քննումը: Պապի կարծիքով՝ դա պետք է կրճատի ամուսնալուծությունների թիվը:
Պապը կոչ է արել ընդհատել արատավոր շրջանը, որի սկիզբը «թույլատրելն է ամուսնությունը՝ առանց պատշաճ նախապատրաստության եւ քննության»:
Ըստ կաթոլիկ եկեղեցու տեսության՝ ամուսնությունն անխախտելի խորհուրդ է: Այն դադարում է միայն ամուսիններից մեկի մահվան դեպքում: Եկեղեցական հատուկ տրիբունալները քննում են միայն ամուսնությունը չեղյալ ճանաչելու դիմումները, ինչը, ի տարբերություն անցյալ դարաշրջանների, այսօր տեղի է ունենում շատ հաճախ: Ամուսնության անլուծարելիությունը բացառում է երկրորդ ամուսնությունը: Միեւնույն ժամանակ, թույլատրվում է զույգի առանձնացումն այն դեպքերում, երբ համատեղ կյանքն անհնարին է դառնում:
Ըստ կաթոլիկ եկեղեցու ավանդույթի՝ նրանք, ովքեր որոշել են ամուսնանալ, պետք է արարողությունից 3 ամիս առաջ գան եկեղեցի: Այդ ընթացքում տեղի է ունենում յուրօրինակ ուսուցում. հոգեւորականը երիտասարդներին պատմում է ամուսնության խորհրդի, քրիստոնեական ընտանիքի, զավակների դաստիարակության մասին:
Ըստ Ընտանեկան քաղաքականության եվրոպական ինստիտուտի տվյալների՝ Եվրոպայում յուրաքանչյուր 30 վայրկյանում ընտանիք է քայքայվում, ամեն տարի՝ միլիոնից ավելի: Ամուսնության միջին տեւողությունը կազմում է 13,9 տարի: Անգլիայում, Ֆրանսիայում, Գերմանիայում միջին հաշվով քայքայվում է երկու ընտանիքներից մեկը: Ամուսնալուծությունների գծով չեմպիոնը Բելգիան է, որտեղ 3 զույգից 2-ը դիմում է ամուսնալուծության համար: Բելգիային զիջում են Իսպանիան եւ Հունգարիան: Ամենից հազվադեպ ամուսնալուծություններ տեղի են ունենում Իտալիայում (19%), Հունաստանում, Ռումինիայում եւ Լեհաստանում: