Իրանական մարդու իրավունքների HRANA լրատու կայքի հաղորդմամբ, Թեհրանի դատախազ Աբաս Ջաֆարի Դոլաթաբադին հայտարարել է, որ պոռնոկայքեր պատրաստելու մեղադրանքով մահապատժի դատապարտված երկու դատապարտյալների թղթածրարը հաստատվելու նպատակով ուղարկվել է Գերագույն դատական ատյան:
Թեհրանի դատախազը հրաժարվել է նշել հիշյալ երկու դատապարտյալների անունը, բայց, շրջանառվող լուրերի համաձայն, նրանց անուններն են Սայիդ Մալեքփուր եւ Վահիդ Ասղարի:
Հարկ է նշել, որ Մալեքփուրի մահապատժի վճիռն արդեն տրվել է Թեհրանի հեղափոխական դատարանի 28-րդ դատաբաժնի դատավորի կողմից:
Նա մեղադրվել է պոռնոկայքերի միջոցով իսլամական համակարգի տապալման օգտին աշխատանք ծավալելու, Աստծո եւ կրոնական սրբությունների դեմ մեղանչելու, երկրի առաջնորդին ու նախագահին անպատվելու, իսլամական համակարգի ընդդիմադիրների հետ կապ պահպանելու մեղադրանքներով:
Հունվարի 30-ին, Մալեքփուրի կինը՝ Ֆաթեմե Էֆթեխարին, BBC հեռուստաընկերությանը տված հարցազրույցում հայտնել է, որ իր ամուսնու դատը տեւել է ընդամենը 15 րոպե, ինչն անարդարացի է, մինչդեռ համակարգչային մասնագետի օգնությամբ հնարավոր կլիներ ապացուցել, որ իր ամուսինը ոչ մի կապ չի ունեցել պոռնոկայքերի ձեւավորման հետ:
Էֆթեխարիի հաղորդմամբ, ամուսինը իրեն վերագրած մեղադրանքներն ընդունել է խոշտանգումների արդյունքում:
Սայիդ Մալեքփուրը նաեւ Կանադայի քաղաքացի է, այնտեղ զբաղվում էր կայքերի ծրագրավորմամբ: Երբ 2009-ին մեկնել էր Իրան, ձերբակալվել էր Իրանի անվտանգության ծառայությունների կողմից: