Տիցիանի «Սուրբ զրույց. Տիրամայրը մանկան եւ Սուրբ Ղուկասի եւ Եկատերինա Ալեքսանդրացու հետ» կտավը հունվարի 27-ին վաճառվել է Նյու Յորքի «Sotherby՝s» աճուրդում՝ 16,9 միլիոն դոլարով: Նախքան աճուրդի սկիզբը՝ կազմակերպիչները հուսով էին նկարը վաճառել 15-20 միլոն դոլարով: Տիցիանի նկարը գնել է եվրոպացի մի հարուստ կոլեկցիոներ: Նա անձամբ ներկա չի եղել աճուրդին, սակայն դրույքները կատարել է հեռախոսով:
Նկարում պատկերված է մանուկ Հիսուսը, ով գտնվելով Աստվածածնի գրկում, ձախ ձեռքը մեկնել է դեպի սրբերը: Համարվում է, որ կտավը նկարվել է 1560 թվականին:
Նույն աճուրդում Նյու Յորքի «Մետրոպոլիտեն» թանգարանը 2,1 միլիոն դոլարով գնել է իտալացի նկարիչ Պերինո դել Վագիի «Սուրբ ընտանիքը մանուկ Սուրբ Հովհաննես Մկրտչի հետ» գործը: