Գեղասահքն արթնանում է

Հայաստանցի երեք պատանի գեղասահորդներ Լյուբլյանայում (Սլովակիա) կայացած ընտրական մրցաշարում աշխարհի պատանիների առաջնության ուղեգիր են նվաճել: Կրտսեր տարիքային խմբում 14-ամյա Սլավիկ Հայրապետյանը գրավել է երկրորդ տեղը, իսկ աղջնակների պայքարում նրա հասակակից Մարթա Գրիգորյանը ճանաչվել է ութերորդը: Այս երկու գեղասահորդները փետրվարի 26-ից մարտի 6-ը Սեուլում կայանալիք աշխարհի կրտսեր պատանիների առաջնությանը մասնակցելու իրավունք են ստացել:
Նույնպիսի հաջողության հասել է նաեւ Սլավիկի ավագ եղբայրը՝ 18-ամյա Սարգիս Հայրապետյանը, որը եզրափակելով լավագույն հնգյակը, մարտ ամսին պատանիների ավագ տարիքային խմբի աշխարհի առաջնության (մարտին՝ Տոկիոյում) ուղեգիր է նվաճել: Հայաստանի գեղասահքի ֆեդերացիայի նախագահ Սամվել Խաչատրյանի փոխանցմամբ, Սլավիկն ու Մարթան մասնակցելու են նաեւ այսօր Չեխիայում մեկնարկող Եվրոպայի օլիմպիական պատանեկան փառատոնին, որտեղ խաղարկվելու են եկող տարի Ինսբրուկում մեկնարկող ձմեռային անդրանիկ պատանեկան օլիմպիական խաղերի ուղեգրեր: