Լոս Անջելեսի «Վարագույր» հեռուստաժամի տնօրեն Ռուդիկ Հովսեփյանն «Առավոտի» հետ զրույցում հավելյալ մանրամասներ պատմեց Կալիֆոռնիայում վնասազերծված «Armenian Power» ավազակախմբին առնչվող իրադարձությունների մասին. «Այստեղ հանցավոր աշխարհի «անունով» ներկայացուցիչներին բոլորին նորից հավաքել են: Հատուկ ծառայությունները նշում են, որ այս հանցագործ խմբի ղեկավարները, «ուղեղը» հայերն են: Խումբը մոտավորապես 200 հոգի է, եւ ոչ միայն Կալիֆոռնիայից են, այլեւ Դենվերից ու Մայամիից: Եվ ամեն ինչ գնում է նրան, որ Նյու Յորք էլ կհասնեն: Սրա տակից կարող է շատ բան դուրս գալ: Եվ հիմնականն այն է, որ փողը այստեղից գնացել է Հայաստան, այսինքն՝ նորից Հայաստանի իշխանավորների կամ նրանց հարազատների, բարեկամների մատը, անուններն անպայման խառնված են լինելու այս գործին: Սա հաստատ է, քանի որ այն անուններն են տալիս, որոնց հետ հանդիպում էին այդ մարդիկ՝ այստեղ այցելելիս»:
Ռուդիկ Հովսեփյանը նաեւ իր դիտարկումները հայտնեց. «Այն գավառականությունը, այն մթնոլորտը, որ կա այսօր Հայաստանում՝ տեղափոխվել է նաեւ այստեղ, եւ Սփյուռքի երիտասարդներն էլ են ապրում այն չափանիշներով, որոնք տեսնում են հայկական եթերում՝ սերիալներ, ռաբիսա-մաֆիոզական ժարգոն, այդ մտածողությունը, մտքերն ու գաղափարները: Եվ դա բերել է նրան, որ Սփյուռքի հայությունն այսօր շատ է համապատասխանում հենց այն վիճակին, ինչն այսօր Հայաստանում է: Մոռանանք այն տարիները, երբ հայերը ամենադաստիարակված ազգի տպավորություն էին թողնում Սիրիայում, Ֆրանսիայում եւ այլուր, եւ ոչ մի անգամ չէին ասի, թե մենք հանցագործ ենք: Իսկ այսօր մենք որտեղ ապրում ենք՝ խնդիրներ ենք ունենում»:
