Հայաստանի առաջատար բջջային օպերատոր եւ մշակույթի բարեկամ «ՎիվաՍել-ՄՏՍ»-ը 12 միլիոն դրամ է հատկացրել «Վերածնունդ» միջազգային փառատոնի իրականացման համար: «Գյումրի քաղաքը հնուց ի վեր հայտնի է որպես մշակույթի, արվեստների ինքնատիպ քաղաք: Ես անձնական շփումից գիտեմ՝ գյումրվա մարդկանց ստեղծագործական մղումն ու կենսունակությունն ուղղակի ապշեցուցիչ են: «ՎիվաՍել-ՄՏՍ»-ը, իր համեստ ներդրումն ունենալով ազգային ինքնության պահպանման ու զարգացման վեհ գործին, աջակցում է «Վերածնունդ» փառատոնին՝ Գյումրիի ժողովրդին մաղթելով ստեղծագործական կորով եւ դժվարություններին դիմակայելու անկոտրում կամք: Հպարտ ենք Գյումրիի պես տաղանդների քաղաքի մշակութային վերածննդին մեր մասնակցությունը ցուցաբերելու համար»,- երեկ նշել է «ՎիվաՍել-ՄՏՍ»-ի գլխավոր տնօրեն Ռալֆ Յիրիկյանը: Երաժիշտ-կատարողների «Վերածնունդ» միջազգային մրցույթ-փառատոնը անցկացվում է 2007թ.-ից: Փառատոնի հիմնական նպատակներն են երեխաների մեջ երաժշտության նկատմամբ սիրո եւ ճաշակի ձեւավորումը: Փառատոնի շրջանակներում իրականացվող աշխատանքները նպաստում են Հայաստանում երաժշտարվեստի զարգացմանն ու մասսայականացմանը: Մրցույթ-փառատոնին մասնակցում են Հայաստանի բոլոր մարզերի, ինչպես նաեւ աշխարհի 22 երկրի շուրջ 1100 պատանի եւ երիտասարդ երաժիշտ-կատարողներ, որոնք հանդես են գալիս նախապես ընտրված ծրագրերով:
