Շվարցենեգերը խոստովանել է

Հայտնի դերասան եւ Կալիֆոռնիայի նախկին նահանգապետ Առնոլդ Շվարցենեգերը կնոջ՝ Մարիա Շրայվերի հետ բաժանվելուց հետո խոստովանել է, որ արտամուսնական երեխա ունի սպասուհուց, գրում է «Los Angeles Times» թերթը։
Իրենց բաժանման մասին ամուսնական զույգը հայտարարել էր մայիսի 9-ին, մինչդեռ ամերիկյան ԶԼՄ-ները գրում էին, որ Շրայվերը տնից հեռացել է դեռեւս տարվա սկզբին, երբ Շվարցենեգերը նրան հայտնել է արտամուսնական երեխայի մասին։
«Պաշտոնից հեռանալուց հետո ես կնոջս պատմեցի, թե ինչ է տեղի ունեցել 10 տարի առաջ»,- խոստովանել է դերասանը։ Նա նշել է, որ ինքն արժանի է քննադատության, եւ իր արարքը արդարացում չունի։ «Ես ներողություն եմ խնդրել Մարիայից, իմ երեխաներից եւ իմ ընտանիքից»,- նշել է Շվարցենեգերը։
Նա նաեւ խնդրել է ԶԼՄ-ներից՝ այս ծանր պահին չանհանգստացնել կնոջը եւ ընտանիքին։
Ամերիկյան լրատվամիջոցները գրում են, որ այդ կինը, որից Առնոլդը արտամուսնական երեխա ունի՝ շուրջ 20 տարի աշխատել է նրանց տանը։