Ադրբեջանական vesti.az-ի փոխանցմամբ, երկրի քաղաքացիական ավիացիայի աշխատակազմը հատուկ հանձնաժողով է ձեւավորել՝ Աֆղանստանում չորեքշաբթի լույս գիշերը ադրբեջանական Silk Way ավիաընկերությանը պատկանող եւ 18 տոննա բեռ փոխադրող՝ Բաքու-Բահրամ չվերթն իրականացնող օդանավի կործանման պատճառները հետաքննելու համար: Ավիաընկերության տնօրենի խորհրդական Ադիլ Հասիմովն ասել է, թե առաջիկայում հանձնաժողովը կմեկնի Աֆղանստան՝ դեպքի վայրը հետազոտելու համար:
Պակիստանում եւ համատեղության կարգով նաեւ Աֆղանստանում Ադրբեջանի դեսպան Դաշգին Շիկարովն ասել է, թե կործանված բեռնատար «Իլ-74 Կ-ԱԶ 55» օդանավի անձնակազմի չորս անդամները Ադրբեջանի քաղաքացիներ են եղել, մյուսները՝ Ուզբեկստանի: Օդանավը կործանվել է Ակսան գյուղի մոտակայքում, լեռան հետ բախվելու եւ ապա այրվելու արդյունքում: Զոհերի մարմինները դեռ չեն գտնվել: Ընդսմին, Պարվանդ գավառի ոստիկանապետ Մուջադդադին հերքել է տարածված տեղեկությունները, թե ինքնաթիռը կործանվել է «Թալիբան» շարժման հարձակման արդյունքում:
