![\"\"](\"https://www.aravot.am/2011/aravot_arm/July/7/p20.jpg\")
Նալբանդյան 29 հասցեում գտնվող «Էսպաս» (Espaces) երիտասարդական կրթամշակութային կենտրոնը ստեղծվել է 2002թ. եւ սկզբից եւեթ նպատակ է ունեցել տարատեսակ ծրագրերի միջոցով խթանել երիտասարդների մասնակցությունը մեր երկրում քաղաքացիական հասարակության զարգացման գործում: Այդ ծրագրերը ներառում են զանազան ցուցահանդեսների եւ համերգների, գրական երեկոների ու բանավեճերի կազմակերպում եւ անցկացում: Նման մի միջոցառում կայացավ օրերս, երբ բացվեց գեղագետ ու մշակութային մեկնաբան Լեւոն Լաճիկյանի գրաֆիկական աշխատանքների հերթական՝ հինգերորդ ցուցահանդեսը: Այն ընդգրկում է 2 տասնյակից ավելի գծանկարներ, որոնցում քաղաքային գողտրիկ տեսարաններ են Հայաստանի եւ եվրոպական մի շարք երկրների (Ֆրանսիա, Իտալիա, Չեխիա, Բելգիա, Լյուքսեմբուրգ եւ այլն) բնակավայրերից:
«Ներկայացված բոլոր աշխատանքների միավորումը հեղինակի ակնհայտ ձգտումն է՝ պատկերելու դրանց արտաքին գեղեցկությունն ու ներքին գրավչությունը, ավելի ճիշտ՝ այդ երկուսի ձույլ ներդաշնակությունը»,- նշեց հիշյալ կենտրոնի լրատվության պատասխանատու Լիլիթ Սոխակյանը: Բացելով ցուցահանդեսը՝ նա շնորհավորեց Լեւոն Լաճիկյանին այս դիտարժան ցուցահանդեսի կազմակերպման կապակցությամբ եւ բոլորին հրավիրեց մինչեւ հուլիսի 12-ն այցելել «Էսպաս» կենտրոն:
