Բանգկոկ քաղաքը հռչակվել է 2013թ. Գրքի համաշխարհային մայրաքաղաք՝ այս տարվա հունիսի 27-ին Փարիզում, ՅՈՒՆԵՍԿՕ-ի գլխամասային գրասենյակում տեղի ունեցած ընտրակոմիտեի նստաշրջանի կողմից: Ընտրակոմիտեն բաղկացած է գրքի՝ աշխարհում համաշխարհային համարում ունեցող 3 պրոֆեսիոնալ ընկերությունների եւ ՅՈՒՆԵՍԿՕ-ի ներկայացուցիչներից: Որոշման մեջ նշվում է, որ Բանգկոկն ընտրվել է «այն կամքի համար, որ քաղաքն արտահայտել է գրքաշխարհի գործիչներին միավորելու, ինչպես նաեւ տարբեր մակարդակներում մշակութային բազմազանությունը խրախուսելու ուղղությամբ»: ՅՈՒՆԵՍԿՕ-ի գլխավոր տնօրեն Իրինա Բոկովան շնորհավորական խոսք է հղել Բանգկոկ քաղաքին՝ նշելով, որ քաղաքի կողմից առաջարկվող բազմազան ծրագրերը կօգնեն հասարակության բոլոր անդամներին, մասնավորապես՝ երիտասարդությանն ու ոչ բարենպաստ ապրելակերպ ունեցողներին, սիրել գիրքն ու ընթերցանությունը: Հիշեցնենք, որ Գրքի համաշխարհային մայրաքաղաքի ընտրությանը մասնակցում են Հրատարակիչների միջազգային միությունը, Գրահրատարակիչների միջազգային ֆեդերացիան եւ Գրադարանների միջազգային ընկերակցությունը: Բանգկոկը Գրքի համաշխարհային 13-րդ մայրաքաղաքն է՝ Մադրիդից (2001թ.), Ալեքսանդրիայից (2002թ.), Նյու Դելիից (2003թ.), Անտվերպենից (2004թ.), Մոնրեալից (2005թ.), Թուրինից (2006թ.), Բոգոտայից (2007թ.), Ամստերդամից (2008թ.), Բեյրութից (2009թ.), Լյուբլյանայից (2010թ.), Բուենոս Այրեսից (2011թ.) եւ Երեւանից (2012թ.) հետո:
