Հովհաննես Գեւորգյանը երեկ կարմիր դիպլոմ ստացավ, հպարտ էր՝ դիպլոմը հանրապետության վարչապետ Տիգրան Սարգսյանը հանձնեց: «Նշանակում է՝ կառավարությունը կարեւորում է տնտեսագիտական կադրերի պատրաստումը համալսարանում»,- ասում է նա: ԵՊՀ-ի տնտեսագիտության ֆակուլտետի բակալավրի կոչում է ստացել, որոշել է մագիստրոսի էլ ստանալ, հիմա էլ աշխատում է բանկում: Արփինե Այվազյանի համար էլ գերազանցիկության դիպլոմ ստանալը անակնկալ չէր, օրն էր միայն անմոռանալի:
Տնտեսագիտության ֆակուլտետում ավարտական կուրսերի դիպլոմների հանձնման երեկվա արարողությանը ներկա էին նաեւ ԿԳ նախարար Արմեն Աշոտյանը եւ ԵՊՀ ռեկտոր Արամ Սիմոնյանը: Ավարտական կուրսերը լսեցին այս կիսամյակի իրենց վերջին դասախոսությունը: Վարողը վարչապետն էր, թեման էր՝ «Գլոբալ տնտեսության եւ Հայաստանի Հանրապետության տնտեսական զարգացումները»: «21-րդ դարում աշխարհը շատ արագ տեմպերով փոքրանում է»,- սկսեց վարչապետը իր դասախոսությունը՝ ընդգծելով համաշխարհային տնտեսության ազդեցությունը մեր երկրի վրա: Դասախոսության ավարտից հետո պարոն Սարգսյանին ներկաները հարցեր ուղղեցին: Ուսանողներից մեկը ցանկացավ հնչեցնել հարց, բայց առաջարկություն արեց. վարչապետի դասախոսությունը ուշադրությամբ լսել էր, երկրի տնտեսական առաջընթացի համար պետք է զարգացնել տուրիզմը, գիտե՝ Հայաստան գալիս են հատկապես իրանցիները: Իրենց երկրի ավանդույթներն այնպիսին են, որ նրանք ազատ չեն կարողանում գնալ խաղատներ, ոգելից խմիչք օգտագործել: «Լավ չի՞ լինի Մեղրիում, որ Իրանի սահմանին մոտ է, նրանց համար տարածքներ ունենանք՝ կազինոներով՝ ժամանցային տուրիզմ ապահովելով, այդպես երկրի բյուջեն էլ կլցվի»,- առաջարկեց ուսանողը, որին ի պատասխան՝ վարչապետը միայն ժպտաց:
