Արժե, որ Մեծ Բրիտանիան վերանայի Իրանի Իսլամական Հանրապետության նկատմամբ իր գործողությունները: Trend-ի փոխանցմամբ, ասել է Իրանի ԱԳՆ նախարար Ալի Ակբար Սալեհին՝ անբավարար գնահատելով Թեհրանի եւ Լոնդոնի միջեւ հարաբերությունների մակարդակը: Իրանական IRNA գործակալության հաղորդմամբ, նախարարը նաեւ հավելել է, թե Իրանը, բացի Իսրայելից, որեւէ երկրի հետ ոչ մի խնդիր չունի եւ ցանկացած երկրի հետ՝ իրավահավասար երկխոսության հիման վրա, հարաբերությունների վերականգնմանը միտված քաղաքականություն է վարում: «Բրիտանական կառավարության կողմից Իրանի հետ դիվանագիտական հարաբերությունները վերանայելու պայմաններում Հորդանանում Իրանի նախկին դեսպան Նոսրաթոլլա Թաջիկի դեմ կիրառված պատժամիջոցը վերանայելու որոշումը կարող է դրական քայլ լինել»:
ԱՄՆ-ի հետ հարաբերությունների առնչությամբ Սալեհին նկատել է, որ եթե Վաշինգտոնը խուսափի այն սխալներից, որոնք արվել են անցյալ տարի, եւ հարգի Իրանի ժողովրդի իրավունքները՝ իրավիճակը կփոխվի: Իսկ ահա Իրանի եւ Սաուդյան Արաբիայի միջեւ առկա տարաձայնությունները, որոնք, դիվանագետի ասելով՝ Մերձավոր Արեւելքում քաղաքական իրադարձություններով պայմանավորված թյուրիմացություններ էին, հեշտությամբ կարելի է հաղթահարել:
