Ռումինիայի դպրոցների շրջանավարտների կեսից ավելին այս տարի տապալվել է միասնական քննություններից, հետեւաբար չի կարող ընդունվել բուհեր: «Դա վատագույն արդյունքն է վերջին 20 տարվա ընթացքում,- ԻՏԱՌ ՏԱՍՍ-ի մատուցմամբ ասել է Ռումինիայի կրթության նախարար Դանիել Ֆուներիուն՝ հավելելով,- երեխաները բավարար գիտելիքներ չեն ստանում դպրոցներում, եւ քանի որ այս տարի հնարավոր բոլոր միջոցներով կանխել ենք քննությունների ժամանակ արտագրելը, շրջանավարտները ստիպված են եղել ինքնուրույն աշխատել»: 2009-ին նվազագույն՝ 6 միավոր հավաքել է շրջանավարտների 80 տոկոսը, 2010-ին՝ 67,4 տոկոսը, այս տարի էլ, փաստորեն, 50 տոկոսից պակասն է դրականի շեմը հաղթահարել: Ռումինացի դիմորդներն ամենից շատ նեղսրտել են լսարաններում տեղադրված տեսախցիկներից, իսկ նախարարությունը համարում է, որ ապահովել է օբյեկտիվ ու թափանցիկ քննություններ:
