![\"\"](\"https://www.aravot.am/2011/aravot_arm/July/26/p17.jpg\")
Վատիկանը, որը Իռլանդիայի վարչապետի կողմից քննադատության է ենթարկվել պեդոֆիլ-հոգեւորականներից երեխաներին պաշտպանելու անհրաժեշտ միջոցառումներ ձեռնարկելու անընդունակության մեջ, ետ է կանչել այդ երկրում իր դեսպանին: BBC-ի փոխանցմամբ, հուլիսի 20-ին վարչապետ Էնդա Քեննին՝ (նկարում) խոսելով իռլանդական Կլոյնի թեմում մանկապղծության դեպքերի առնչությամբ անկախ հետաքննության արդյունքների մասին, հայտարարել էր, թե՝ փոխանակ միջոցներ ձեռնարկելու բռնություններն արմատախիլ անելու ուղղությամբ, Սուրբ աթոռը փորձում է պաշտպանել իր իշխանությունը:
Իսկ անկախ հետաքննության վերաբերյալ զեկույցում մասնավորապես ասվում է, թե հոգեւորականները իշխանություններից թաքցրել են ընդհուպ մինչեւ 2009թ. Իռլանդիայում հոգեւորականների կողմից երեխաների նկատմամբ կիրառված սեռական բռնությունների փաստերը:
Ավելի վաղ, Պապի նվիրակը խոստացել էր հետաքննության արդյունքների վերաբերյալ զեկույցը եւ իռլանդական կառավարության դիրքորոշումը հասցնել Սուրբ աթոռի ղեկավարին, բայց այդպես էլ ներողություն չէր խնդրել կատարվածի համար՝ հաղորդելով միայն, թե ափսոսում է տեղի ունեցածի համար:
