Օդային զորավարժություններ՝ բնակիչների գլխավերեւում

Զորամասամերձ համայնքների բնակիչները  չգիտեն աղմուկից ուր փախչեն

«Առավոտի» խմբագրությանը հաճախ են դիմում Երեւան համայնքի Նորագավիթ, Սովետաշեն, երեւանամերձ Այնթապ համայնքի բնակիչները, ովքեր իրենց բողոքն են արտահայտում իրենց հանգիստը խանգարող ամենօրյա աղմուկից: Ըստ բնակիչների, գրեթե ամեն օր վաղ առավոտից իրենք զարթնում են ռազմական ուղղաթիռների հռնդալից աղմուկից, որն իրենց ուղեկցում է գրեթե ողջ օրվա ընթացքում: «Ամբողջ օրը արեւի տակ քիչ ենք տանջվում այս հողերի մեջ, դեռ այդ դղրդոցն էլ մյուս կողմից: Այնպիսի աղմուկի մեջ ենք ապրում, որ մեր ականջները ուղղակի չեն հանգստանում: Երբեմն այդ ուղղաթիռներն այնքան են մոտենում տներին եւ այնպիսի աղմուկ հանում, որ թվում է, թե ուր որ է կընկնեն մեր տան վրա կամ բակում: Չգիտենք, գլուխներս առնենք ուր կորչենք: Հնար լինի, տունը կվաճառենք-կգնանք այս աղմուկի ձեռքից»,- ասում է Այնթապի բնակչուհիներից մեկը: Իսկ մեկ այլ բնակիչ ասում է. «Տանը ունեմ մանկահասակ երեխաներ, որոնք քնելու ռեժիմ չունեն՝ այս դղրդոցի պատճառով: Տղաս կարծես վախեցած լինի, որ սրանք սկսում են աղմկել, մտնում է տուն ու ասում, որ դուռն ու լուսամուտները պինդ փակենք: Բայց դա էլ չի օգնում: Իսկ ուղեղի կաթված տարած սկեսրոջս համար այս աղմուկն ուղղակի սպանիչ է: Երբեմն երեխայի նման լաց է լինում, ասում է աղմուկից գլուխս ցավում է»:
Այն, որ մեր ռազմական ավիացիան ուժեղ է, հպարտանալու առիթ է բոլորիս համար, բայց զորավարժություններ կատարելը հենց բնակավայրերի վրա, դժվար թե տրամաբանական լինի, այն դեպքում, երբ մեր հանրապետության տարածքում, հենց զորամասերին մոտ կան տարածքներ, որոնք բնակելի չեն եւ զորավարժություններ կարելի է անել հենց այդ վայրերում, առանց բնակիչներին գլխացավանք պատճառելու՝ բառիս ուղղակի իմաստով: