Երեկ հայտնի դարձավ, որ ՀՀ նախագահ Սերժ Սարգսյանը ՀՀ ոստիկանապետի պաշտոնից ազատել է Ալիկ Սարգսյանին եւ նրա փոխարեն այդ պաշտոնում նշանակել է ՀՀ ՊՆ փոխնախարար Վլադիմիր Գասպարյանին: Այս նշանակման առնչությամբ Հելսինկյան քաղաքացիական նախաձեռնության Վանաձորի գրասենյակի ղեկավար, իրավապաշտպան Արթուր Սաքունցն «Առավոտի» հետ զրույցում կարծիք հայտնեց, թե Գասպարյանի նման մարդու նշանակումը ՀՀ ոստիկանապետի պաշտոնում ցույց է տալիս, որ պետությունը որդեգրել է հանրային կարծիքի վրա թքած ունենալու քաղաքականություն. «Իշխանությունների համար նորմալ է, որ հասարակական նախաձեռնություններով հանդես եկող շարժումների դեմ հրապարակային հայտարարություն արած անձին, ինչպիսին Վովա Գասպարյանն է, վստահի իրավապահ լուրջ կառույցի` ոստիկանության ղեկավարի պաշտոնը: Դա ցույց է տալիս, թե իշխանությունն ինչպիսի վերաբերմունք ունի հանրության նկատմամբ: Եվ, իհարկե, դա տեղավորվում է նախընտրական տրամաբանության մեջ, երբ փորձ է արվում ուժեղացնել ոստիկանությունը, որը իշխանության ձեռքում հասարակական շարժումների կամ գործիչների դեմ որպես` բռնության ու ճնշման գործիք է օգտագործվում: Այդ տեսակետից որեւէ զարմանալի բան չկա, բայց եթե հույս ունեն, որ դրանով կարող են կասեցնել մեր հրապարակային գործունեությունը` չարաչար սխալվում են»,– ասաց Արթուր Սաքունցը:
ՀՀ ոստիկանության պետի պաշտոնում այս նոր նշանակման առնչությամբ մի փոքր այլ կարծիք ուներ «Ժառանգություն» խորհրդարանական խմբակցության ղեկավար Ստեփան Սաֆարյանը: Ըստ նրա, Վլադիմիր Գասպարյանի նշանակումը ՀՀ ոստիկանապետի պաշտոնում, իհարկե, նախընտրական պատրաստություն է: Հարցին, թե ի՞նչ կարող է անել այս պաշտոնում Վլադիմիր Գասպարյանը, որ չի արել Ալիկ Սարգսյանը, պատգամավորն այսպես արձագանքեց. «Հարցն այն չէ, թե ի՞նչ կարող էր անել, այլ այն, թե` Ալիկ Սարգսյանը կարո՞ղ էր անել ավելին, որպեսզի Սերժ Սարգսյանի համար խնդիրներ չծագեին»: Ստեփան Սաֆարյանը նկատի ուներ անցած հինգշաբթի օրը ՀՀ կառավարության շենքի մոտ մի քանի տասնյակ քաղաքացիների դեմ ցուցադրաբար ոստիկանական մեծ ուժեր կուտակելու փաստը, որն առաջացրել էր լարում եւ դժգոհություն: Պատգամավորի դիտարկմամբ, խնդիրն այն է, թե արդյոք Ալիկ Սարգսյանը, որը քաղաքացիների մի փոքր խմբի դեմ այդքան ուժեր էր դուրս բերել, կարո՞ղ է իրավիճակը վերահսկել հասարակական ավելի մեծ ուժերի կուտակման դեպքում: Ըստ Սաֆարյանի` ոչ. «Ալիկ Սարգսյանն ուղղակի ի վիճակի չէ գործել իրավիճակին համարժեք: Սա ավելի շատ կարողությունների խնդիր է, որ նա չուներ: Հիմա փորձում են բերել մեկին, որը իրավիճակի կլինի ավելի ադեկվատ գործել իր առջեւ կանգնած խնդիրը լուծելիս»: Պատգամավորի համոզմամբ, եթե ոստիկանությունում այդպիսի անձանց փոխատեղում է կատարվել, նշանակում է` Սերժ Սարգսյանն ուզում է հասարակական ընկալման իմաստով ունենալ ավելի պակաս խնդիրներ:
