Կապանում գործող մարզական տարբեր խմբերն իրենց պարապմունքներն ու մարզումները անցկացնում են այս կամ այն կրթական հաստատության մարզադահլիճում կամ որեւէ այլ տարածքում: Կապանը մարզադպրոցների կարիք ունի, քաղաքի հիմնական մարզադպրոցը աշխատում է գերհագեցած ու ծանրաբեռնված ռեժիմով: Ու այս պայմաններում քաղաքի հին մարզադահլիճներից մեկը քանդում-վերափոխում են, որ ծառայի ոչ մարզական նպատակների:
Կապանի մանկապատանեկան ստեղծագործության կենտրոնի նախկին մարզադահլիճը, որտեղ տարիներ շարունակ կազմակերպվել ու անցակացվել են տարաբնույթ մրցաշարեր, մարզական խմբակների մարզումներ, որ նաեւ ավելի քան 100 հանդիսական ընդունելու հնարավորություն ուներ՝ մոտ ապագայում դառնալու է առետրի կենտրոն:
Կապանցիներից շատերն ուրախացան՝ տեսնելով վթարային մարզադահլիճում սկսված շինարարությունը, ենթադրեցին, թե վերջապես նորոգվում է հաստատությունը, կվերականգնվեն մրցաշարերի անցկացման նախկին ավանդույթները: Սակայն, ինչպես պարզվեց, ուրախանալու առիթ չկա, դահլիճը քանդվում է՝ տեղը հիպերմարկետ կառուցելու նպատակով:
Մեր այցելության ժամանակ մարզադահլիճի ներսի հատվածն արդեն քանդված էր, ակտիվ շինարարություն էր ընթանում, շինարարներն էլ հեռվից գոռում էին, որ չլուսանկարենք՝ իրենց ղեկավարն է այդպես ասել:
Կարդացեք նաև
Փորձեցինք գտնել նախկինում այս դահլիճում կարատեի պարապմունքներ անցկացնող սաներին: Պարզվեց՝ նրանք՝ 40 երեխա, հիմա մարզվում են նույն շենքի նկուղային, խոնավ, ցուրտ ու մութ հարկում:
«Այս նկուղից այլ տեղ չենք էլ կարող տեղափոխվել, որովհետեւ տարածքները թանկ են: Կապան քաղաքի ավագանու որոշմամբ` համայնքի տարածքների վարձակալման համար սահմանված է մեկ քմ՝ 500 դրամ, իսկ ես չէի կարող երեխաներից ավելի գումարներ վերցնել, որ տարածք վարձակալեմ: 200 քմ–ի համար ամսական 100 հազար դրամ միայն տարածքի համար պիտի վճարեինք: 96-ից մինչ օրս մեկ աշակերտի անդամավճարը ամսական 2000 դրամ է: Մենք այդդ գումարներից վճարումներ ենք անում կարատեի համապատասխան ֆեդերացիաներին, որպեսզի երեխաները կարողանան ե’ւ մրցումների մասնակցել, ե՛ւ կարգ ստանան», – մեզ հետ զրույցում տեղեկացրեց խմբի մարզիչ Շահեն Բաբայանը:
Մեր տեղեկություններով, վթարային դահլիճը վաճառվել է Կապանի նախկին քաղաքապետի օրոք: Տարածքի տերն էլ որոշել է այսօր կառուցել հիպերմարկետ:
Մարզադահլիճի խնդրով շահագրգիռ անձինք դիմել են նաեւ Սյունիքի մարզի Շահերի պաշտպանության եւ աջակցության կենտրոնին: Բայց Կապանի քաղաքապետարանի քաղաքաշինության բաժնին պետ Արմեն Ստեփանյանի խոսքով, տարածքում իրականացվող աշխատանքները կատարվում են շինթույլտվության հիման վրա: «Տարածքը սեփականության իրավունքով պատկանում է գործարար Կարեն Ոսկանյանին, ով կառուցում է հիպերմարկետ, գործունեությունը ծավալում է շինթույլտվության պահանջներին համապատասխան»,- նշել է պարոն Ստեփանյանը:
Մերի ՍՈՂՈՄՈՆՅԱՆ
