ՀՀ ԱԺ-ում այսօր հայտարարությունների ժամին «Ժառանգություն» խմբակցության պատգամավոր Լարիսա Ալավերդյանն անդրադարձել է «ստվերին» եւ առաջարկել բյուջեն լցնելու աղբյուրներ: Նա, մասնավորապես, ասել է.«Մեր խմբակցությունը տարիներ շարունակ ներկայացնում է օրենսդրական նախաձեռնություններ և առաջարկներ, որոնց ընդունումն ու իրականացումը կբերի այնպիսի բյուջեի ձևավորմանը, որը կնպաստի օլիգարխիկ համակարգի արմատախիլ անելուն եւ մարդակենտրոն քաղաքական համակարգ ստեղծելուն։ Ամեն անգամ «բյուջեում փող չկա» սեփական անկարողության մասին վկայող պատճառաբանությամբ, կառավարությունը և իշխանական կոալիցիան մերժում են դրանք։ Այնինչ բյուջեի շեշտակի ավելացման աղբյուրները գտնվում են ամենապայծառ եւ տեսանելի հատվածներում, որոնք իրենց այսպես կոչված հարմարավետության պատճառով է, որ «փաղաքշորեն» կոչվում են ստվեր: Ահավասիկ այդպիսի աղբյուրներից մի քանիսը.
Ստվերային տնտեսության մեջ գտնվող օլիգարխներին, հարկման դաշտ բերելով, արդեն 2012թ.-ին հարկերի մասնաբաժինը ՀՆԱ-ում հասցնել ոչ թե նախագծային 17,36%-ի, այլ մինչեւ 23%, որի շնորհիվ բուջե կմուտքագրվի հավելյալ շուրջ 245 մլրդ դրամ:
Շրջակա միջավայրում արտադրության եւ սպառման թափոնների օրենքով սահմանված կարգով տեղադրման դիմաց բնապահպանական վճարների մետաղական հանքերը շահագործող տնտեսվարող սուբյեկտներից ամբողջական գանձման արդյունքում պետական բյուջեն կավելանա 418 մլրդ դրամով:
Միայն Զանգեզուրի պղնձամոլիբդենային կոմբինատի, Հրազդան, Աբովյան քաղաքներում և Սյունիքի մարզի Սվարանց գյուղում գտնվող երեք երկաթահանքերի հետ կապված ապօրինի եւ ստվերային գործարքների վերանայման շնորհիվ հնարավոր է պետության բյուջե վերադարձնել ավելի քան 266 մլրդ դրամ:
Կարդացեք նաև
Ռեզիդենտ կամ ոչ-ռեզիդենտ ֆիզիկական անձի` 700մլն դրամը գերազանցող սեփականության` անշարժ գույքի, ներառյալ հողի հանդեպ, շքեղության միանվագ հարկի կիրառումից բյուջետային նվազագույն մուտքերը կավելանան` 200 մլրդ դրամով:
Բյուջեի ավելացման աղբյուրները բազմաթիվ են եւ առերևույթ: Միայն հայրենի կառավարության «գուրգուրանքի» շնորհիվ է վերարտադրվում օլիգապոլիան, օրից օր հարստացնելով բնակչության 1 %-ից պակաս մարդկանց խումբը ի հաշիվ ժողովրդի 99 %-ի աղքատացման»:
