Իջեւանի ավագանու նոյեմբերի 28-ին կայացած նիստում որոշվել է համայնքի սեփականությունը հանդիսացող «Սպիտակ լիճ» արհեստական ջրամբարը անհատույց օգտագործման հանձնել «Իջեւան տուրիզմ եւ բիզնես» ՍՊԸ-ին՝ 40 տարի ժամկետով: Դեռեւս գործող քաղաքապետ Վարուժան Ներսիսյանը նման առաջարկը ներկայացնելիս հիմնավորել է այսպես. «Իջեւան քաղաքի զարգացման հայեցակարգին համապատասխան «Սպիտակ լիճ» արհեստական ջրամաբարը եւ շրջակա կանաչապատ տարածքը հանդիսանում են հանգստի եւ ժամանցի գոտիներ: Ջրամբարը բերուկներից տարիների ընթացքում լցվել եւ ճահճացել է` ստեղծելով անբարենպաստ բնապահպանական իրավիճակ: Ջրամբարի հնարավորինս մաքրումը գետի բերուկներից խիստ կարեւոր է եւ օրախնդիր է, կապված է մեծ ներդրումների հետ, որի հնարավորությունը համայնքային բյուջեն չունի»:
Ջրամբարը մասնավոր ընկերությանն անհատույց հանձնելու առաջարկը կայացվել է «ջրամբարի բնապահպանական իրավիճակը որոշ չափով շտկելու» անհրաժեշտությունից: Նշենք, որ «Իջեւան տուրիզմ եւ բիզնես» ՍՊԸ-ի տնօրենը եւ համասեփականատերերից մեկը Վարուժան Ներսիսյանի բարեկամ, Իջեւանի ավագանու անդամ Կարեն Ներսիսյանն է: Ընկերության մյուս երկու սեփականատերերն են ծագումով սարիգյուղցի Սեյրան Սարիբեկյանը եւ Իջեւանի տուրիզմի կենտրոնի աշխատակից Նաիրա Գեւորգյանը:
Ոսկան ՍԱՐԳՍՅԱՆ
Կարդացեք նաև
