Տղամարդուն խաբելու, համոզիչ թվալու համար առաջարկվում է ապահովել ցավից տնքացող կնոջ կերպար
Վաճառքում հայտնված 20 000 դրամանոց արհեստական կուսաթաղանթներ ներմուծողը՝ «ապրանքը» հեշտությամբ իրացնելու նպատակով, լուրը տեղադրել էր List.am հայտարարությունների կայքում, շեշտել, որ եթե ցանկանում եք վերականգնել կուսաթաղանթն ընդամենը 5 րոպեում, առանց բժշկական միջամտության, առանց ցավի, ապա կարող եք ձեռք բերել այդ արհեստական կուսաթաղանթները:
«Առավոտը» փորձել էլ կապ հաստատել հայտարարության հեղինակի հետ, պարզելու համար՝ արհեստական կուսաթաղանթներ ներմուծողը որտեղի՞ց է դրանք Հայաստան բերում եւ, ամենակարեւորը, մի՞թե դրա օգտագործումը վտանգավոր չէ առողջության համար: Մեր հարցերին ի պատասխան՝ վաճառողը նշել է. «Ինչպես գիտեք, որոշ ազգերի մշակույթներում դեռեւս պահպանված է հարսնացուի կույս լինելու ավանդույթը եւ հարսանեկան առաջին գիշերվանից հետո «կարմիր խնձորի» խորհուրդը: Իսկ կնոջ կուսությունը խիստ կապված է ընտանիքի անվան ու պատվի հետ: Որոշ կանայք կորցնում են իրենց կուսությունը մինչեւ ամուսնությունը՝ սեռական ճանապարհով, սակայն կուսաթաղանթի պատռվելու պատճառ կարող են հանդիսանալ նաեւ ակտիվ սպորտով զբաղվելը, ֆիզիկական միջամտությունը եւ այլն: Սա կարող է հանգեցնել մի շարք լուրջ խնդիրների կամ մեղադրանքների, վեճերի ու հոգեբանական սթրեսների: Այժմ գոյություն ունի վերոնշյալ խնդիրներից զերծ մնալու լավագույն միջոցը, որն արտադրվել է Մեծ Բրիտանիայում, հաստատված՝ աշխարհի լավագույն գինեկոլոգների ու բժիշկների կողմից, որպես անվտանգ եւ հիգիենիկ միջոց, որը եւ մատչելի է կուսաթաղանթի վերականգնման վիրահատությունից եւ չի պահանջում բժշկական միջամտություն, անցավ է, ապահով եւ պարզ՝ օգտագործման համար»:
Կուսաթաղանթների վաճառքով զբաղվողը նաեւ շեշտել է՝ «արտադրանքը» ունի օգտագործման պարզ ձեւ եւ աշխատում է 100%-ով: Այն կլինիկապես ապացուցված է որպես ոչ թունավոր մարդու օրգանիզմի համար եւ չի առաջացնում կողմնակի բարդություններ, անցավ է օգտագործելիս եւ ալերգիկ ռեակցիաներ չի առաջացնում»:
Մանրամասնելով «արտադրանքի» օգտագործման եղանակը, այն իրացնողը նաեւ հորդորում է դիմել խորամանկ քայլերի, քանի որ արհեստական կուսաթաղանթը տեղադրելուց 15-20 րեպե է պահանջվում տղամարդուն խաբելու համար. առաջարկում են ձգձգել սեռական հարաբերությունը, իսկ դրա ընթացքում՝ «ապահովել ցավից տնքացող կնոջ կերպար՝ առավել համոզիչ թվալու համար»:
Վաճառողը նաեւ նշում է, քանի որ փաթեթը արտադրվում է առանց ցուցումների (ինչն արդեն նորմալ չէ.- Ե. Հ.), խնդրում է օգտագործելուց առաջ հետեւել իրենց հրահանգներին, իսկ թե ովքեր են իրենք՝ բժիշկներ, հոգեբաններ, էլեկտրիկներ, թե սանտեխնիկներ՝ հայտնի չէ:
Արհեստական կուսաթաղանթների կիրառության մասին «Առավոտը» զրուցեց նաեւ սեքսապաթոլոգ Վրեժ Շահրամանյանի հետ, որի կարծիքով էլ՝ սա հերթական միջոց է, որի օգնությանը՝ իբրեւ փրկարար օղակի, կդիմեն որոշակի կարծրատիպային մտածելակերպի կանայք: «Բժշկական տեսակետից այն հուսալիություն եւ լրջություն չի ներշնչում, քանի որ ենթադրում է թատերական ունակությունների կիրառում (Հարաբերության ընթացքում ապահովեք ցավից տնքացող կնոջ կերպարը՝ առավել համոզիչ թվալու համար): Այս ամենը հանգեցնում է սեռական հարաբերությունների ընթացքի վերահսկման, կեղծիքի եւ սահուն ու անկաշկանդ ընթացքի խեղաթյուրման՝ հետեւանք դառնալով մի շարք լուրջ սեռական խանգարումների, որոնց հետ հաճախ բախվում ենք: Որպես երեւույթի ավելի լուրջ բացասական հետեւանք՝ կարելի է նշել այն, որ արդյունքում զգալիորեն կշատանա խաբված ամուսինների թիվը, ինչն էլ իր հերթին կարող է հանգեցնել միջանձնային հարաբերությունների խանգարմանը, սեքսուալ նեւրոզների առաջացմանը եւ, ինչու չէ, հետագայում նաեւ՝ ամուսնալուծությունների շատացմանը: Ցանկացած տեսակի հարաբերությունների ամրության գրավականը անկեղծությունն է»,- նշեց Վ. Շահրամանյանը, հավելելով, որ հայ հասարակության մեջ «կուսություն» ասվածը շատ կնճռոտ հարց է: Ըստ նրա՝ «մարդիկ հաճախ չեն տարբերում «կուսություն» բարոյական հասկացությունը եւ «կուսաթաղանթ» անատոմիական տերմինը՝ չգիտակցելով, որ կուսությունը մարդն է, նրա բարոյական նկարագիրն ու արժանիքները: Սա անհատական հարց է, յուրաքանչյուր զույգի որոշելիքն է՝ ապրե՞լ մինչամուսնական սեռական կյանքով, թե՞ ոչ: Վերջիվերջո, սիրո եւ ներդաշնակության գրավականը անատոմիական թաղանթը չէ»:
Ե. ՀԱԿՈԲՅԱՆ
«Առավոտ» օրաթերթ
