ԱԺ արտաքին հարաբերությունների հանձնաժողովի նախկին նախագահ, ՀԱԿ անդամ եւ Հայաստանի լիբերալ կուսակցության ղեկավար Հովհաննես Հովհաննիսյանը «Երեւակ» ամսագրին ասել էր, որ մեր դեսպաններն անգործության են մատնված, որ մենք ունենք ոչ թե քաղաքական նշանակության դեսպաններ, այլ` կադրային քաղաքականության դեսպաններ, դեսպաններ ունենք, որոնք 10 տարուց ավելի է` նշանակվել են եւ չեն եկել Երեւան: Ըստ նրա, այդ դեսպաններին հետ չեն կանչում, քանի որ լավ հարաբերություն են ունենում գործող ռեժիմի հետ:
Այսօր Aravot.am-ը ՀՀ արտաքին գործերի նախարար Էդվարդ Նալբանդյանի հետ զրույցում նրանից հետաքրքրվեց` մեր դեսպանները հանձնարարություններ ստանո՞ւմ են եւ կհիշե՞ք որեւէ հանձնարարություն, որ տրվել է մեր դեսպաններին: Նախարարի խոսքերով` «Այդպիսի հայտարարություններն անլուրջ անհեթեթություններ են, միայն 2011-ին հանձնարարությունների եւ փաստաթղթերի շրջանառության մասով արտգործնախարարություն եւ կենտրոնական ապարատ եւ դեսպանություններ` 160 հազար է եղել»:
Մեր դիտարկմանն ի պատասխան, որ ԱՄՆ-ն 3 տարի հետո իր դեսպաններին հետ է կանչում, իսկ մեր դեսպաններն արտերկրում անձնական գործեր, բիզնես են դնում, հետ չեն գալիս` նախարարը վստահեցրեց, որ դա չի համապատասխանում իրականությանը. «Դուք նայեք ցուցակները եւ տեսեք ով որտեղ է գտնվում եւ ինչքան: Մեր բոլոր դեսպանները վերջին շրջանում փոխվել են, իսկ այն դեսպանները, որոնք մենք գտնում ենք, որ արդյունավետ աշխատանք են տանում, կարող են մնալ` ըստ նախագահի որոշման»:
Հռիփսիմե ՋԵԲԵՋՅԱՆ
