«Հայաստանի նախագահի հեղինակությունը ապահովված է ե՛ւ Հայաստանի քաղաքական միջավայրում, եւ՛ առավել եւս, վերջին տարիներին, իմիջը բարձրացել է միջազգային հանրության շրջանում»,- Aravot.am-ի հետ զրույցում ասաց ՀՀԿ խմբակցության ղեկավար, ՀՀԿ փոխնախագահ Գալուստ Սահակյանը՝ չհամաձայնելով քաղաքագետ Լեւոն Շիրինյանի կարծիքին, թե նախագահի ինստիտուտի, նրա հեղինակության բարձրացման խնդիր կա:
Գալուստ Սահակյանի խոսքերով, հենց ինքը նախագահն է աշխատել իր իմիջի բարձրացման վրա. «Բավականին խորիմաստ, փիլիսոփայորեն է մոտենում հայաստանյան անցքերին, հիմնական գործոնը հենց ինքը նախագահն է»:
ՀՀԿ փոխնախագահից հետաքրքրվեցինք՝ համամի՞տ է քաղաքագետի հայտարարությանը, թե «Լավ կլիներ, որ հանրապետության նախագահը հանկարծ չգլխավորեր ցուցակը, ինչո՞ւ, որովհետեւ դա անմիջականորեն կդիտվեր ռուսական փորձի պատճենահանում, բնականաբար՝ չէր գնահատվի եւ նախագահի ինստիտուտը կարժեզրկվեր»: Ի պատասխան ՀՀԿ խմբակցության ղեկավարը ասաց. «Չեմ ուզում հակադարձել, որովհետեւ մեր մենթալիտետն է, ով ինչ մտածում, ասում է: Ամբողջ աշխարհում համակարգը քաղաքական կուսակցական է, ինքը կայսրերի դարաշրջանի բաներ է խոսում , սովորաբար, ցանկացած կուսակցության լիդեր գլխավորում է ընտրացուցակը, կուսակցության ընտրացուցակը նրա համար է, որ կուսակցությունն ամբողջովին արտահայտված լինի»:
Արփինե ՍԻՄՈՆՅԱՆ
Կարդացեք նաև
