ՀՀ կառավարությունը որոշել է «Մարդու վերարտադրողական առողջության եւ վերարտադրողական իրավունքների մասին» օրենքում փոփոխություններ կատարել եւ արգելել օտարերկրացիներին՝ Հայաստանի Հանրապետությունում օգտվել փոխնակ մոր ծառայությունից: Նշենք, որ գործող օրենքն առաջարկվել էր արդարադատության նախարարության կողմից, երբ նախարար էր Դավիթ Հարությունյանը: Այժմ ԱԺ պատգամավոր Դավիթ Հարությունյանն էլ փորձում է պաշտպան կանգնել իր հեղինակած օրենքին՝ կառավարությանը ներկայացնելով մեկ այլ նախագիծ:
Կառավարության նախորդ նիստում պարոն Հարությունյանի նախագիծը մերժվել էր՝ պատճառաբանությամբ, որ պատգամավորի այդ նոր նախագծով թույլատրվում է փոխնակ մայրությունն օգտագործել առեւտրային նպատակով:
«Կարծում եմ, կառավարության մոտեցումը շատ խոցելի է: Նախ՝ իմ համոզմամբ՝ կառավարության մոտեցումը չի արգելում կոմերցիոն փոխնակ մայրությունը, այլ ընդամենը փորձում է սահմանափակել օտարերկրացիների կողմից Հայաստանի Հանրապետության տարածքում սուրոգատ մայրությունից օգտվելը: Սա ամենեւին չի լուծում սուրոգատ մայրության հարցը: Եվ սա, իմ կարծիքով, կոպիտ սխալ է: Ցանկացած ոք կարող է հանդես գալ որպես սուրոգատ մայր, իսկ կառավարությունը փորձում է դա սահմանափակել. դա անհասկանալի, անիմաստ եւ իր նպատակին չհասնող նախագիծ է,– մեր զրույցի ընթացքում ասաց պրն Հարությունյանը:- Ի վերջո, Հայաստանի Հանրապետության քաղաքացու համար կարող է լինել կոմերցիոն, այսինքն՝ նրանք կոմերցիոնի դեմ չեն պայքարում, նրանք ընդամենը պայքարում են, որ օտարերկրացիները չգան Հայաստան՝ սուրոգատ մայրությունից օգտվելու համար»:
ԱԺ պետաիրավական հարցերի մշտական հանձնաժողովի նախագահ Դավիթ Հարությունյանի ներկայացմամբ՝ հենց իր առաջարկած նախագծում կան դրույթներ, որոնք արգելում են փոխնակ մայրության որեւէ կոմերցիա. Օրինակ՝ այդ մասին գովազդելը կամ որեւէ մեկը միջնորդություն անի՝ փոխնակ մայրեր ապահովելու համար եւ այլն:
Կարդացեք նաև
Թեմայի վերաբերյալ մանրամասները կարդացեք տպագիր «Առավոտի» առաջիկա համարներից մեկում:
Նելլի ԲԱԲԱՅԱՆ
