Այսօր Aravot.am-ը ՀՀԿ փոխնախագահ Գալուստ Սահակյանից պարզաբանումներ խնդրեց երեկվա ՏԻՄ ընտրություններում արձանագրված խախտումների հետ կապված: Մեզ մասնավորապես, հետաքրքրում էր, թե որեւէ տարօրինակ բան չկա՞ր, երբ Պեմզաշեն համայնքում ընտրատեղամասերում աղջիկներին ծաղիկներ են բաժանել: Գալուստ Սահակյանն ի պատասխան՝ ասաց` «Է՞լ ինչ էին անում աղջիկներին: Ես տեղյակ չեմ, թե Պեմզաշենում ինչ է կատարվել, ով ընտրվել է Հանրապետական չէ: Գիտեք, Կարաբալայի հիմնական մոտեցումը մի բերեք մտցրեք քաղաքականություն: Դա Կարաբալան է, ինձ հարց մի տվեք: Եթե գյուղական միջայրում ծաղիկ են բաժանել` դրանից կարելի է հուզվել, ավելի լիրիկ դառնալ, բայց ծաղիկով, համենայնդեպս, ընտրաքվե չեն առնի»:
Մենք նաեւ հարցրեցինք, երեկվա ընտրություններում ընտրողներից մեկի պահանջը, թե ուզում են ընտրակաշառքների արդար ու հավասար բաշխում` տեղի՞ն է: Հիշեցնենք, որ երեկ դեպք էր արձանագրվել, երբ ընտրողը բողոքել էր, որ երկու երեխա ունի, ինչո՞ւ պիտի մյուսներին ընտրակաշառք տան, իրեն` ոչ: Այս առնչությամբ Գալուստ Սահակյանը պատասխանեց. «Դրանք կարող են պրովոկացիաներ լինել: Խնդիրն այն է, որ այսօր ձեր ասած անձը որեւէ տեղ չի բողոքել, որ իր իրավունքները խախտված են: Կամ մյուսն ասում է՝ փող են բաժանել, ոչ էլ կարողանում է ասել, թե ով է բաժանել: Այնպես որ` դրանք հետեւանքներ են: Ռեալ իրականությունը բողոքներն են, իսկ բողոքներ չեն եղել»:
Հռիփսիմե ՋԵԲԵՋՅԱՆ
