Հայաստանի բնապահպանության նախարարությունը նախատեսում է այս տարի պատվիրել երկու հարյուր գայլի ոչնչացում։ Այդ գործը կազմակերպելու համար ՀՀ կառավարության այսօր կայանալիք նիստում նախատեսվում է բնապահպանության նախարարությանը հատկացնել լրացուցիչ քսան միլիոն դրամ։ «Վերջին երեսուն տարիների ընթացքում գայլերի ոչնչացման համար պարգեւատրման մեխանիզմներ չեն կիրառվել, եւ այդ գործընթացի բացակայությունը հանգեցրել է գայլերի թվաքանակի աճին։ Այս հանգամանքն առաջ է բերել ոչ միայն սոցիալ–տնտեսական, այլ նաեւ բնապահպանական լուրջ խնդիրներ, ինչը, օրինակ, վերջին տարիներին արձանագրվում է «Խոսրովի անտառ» եւ «Շիկահող» պետական արգելոցներում՝ մի շարք կենդանատեսակների, այդ թվում՝ ՀՀ կենդանիների Կարմիր գրքում գրանցված կենդանատեսակներին հասցված վնասով»,- այսպես է հիմնավորել գայլերի ոչնչացման անհրաժեշտությունը բնապահպանության նախարարությունը։ Նշված քսան միլիոնը ուղղվելու է գայլերի ոչնչացման համար որսորդներին վճարվելիք պարգեւավճարներին։ Սպանված յուրաքանչյուր գայլի դիմաց որսորդը կստանա 100 հազար դրամ։
«Հայկական ժամանակ»
