«Արտակարգ դրության իրավական ռեժիմի մասին» օրինագծի քվեարկությունից առաջ, երբ «Ժառանգություն» խմբակցության պատգամավոր Զարուհի Փոստանջյանը տեղում կանգնել եւ հաշվում էր նիստերի դահլիճում ներկա պատգամավորների թիվը` դրանք հետո քվեարկությանը մասնակցածների թվի հետ համեմատելու համար, ՀՀԿ-ական պատգամավորների նյարդերը տեղի տվեցին: Նախ ԱԺ նախագահ Սամվել Նիկոյանը նրան առաջարկեց բարձրանալ նախագահություն` ասելով, թե «տիկին Փոստանջյան, այդ դեպքում եկեք այստեղ, այստեղից ավելի լավ կերեւա», դահլիճում պատգամավորների միջեւ բանավեճ սկսվեց, որը Նիկոյանը լռեցնել չէր կարողանում: Ապա ձայն խնդրեց ՀՅԴ խմբակցության ղեկավար Վահան Հովհաննիսյանը. «Այն, ինչ մենք տեսնում ենք լուսատախտակին` հետաքրքիր պատկեր է (խոսքը գրանցված պատգամավորների թվի մասին էր- խմբ.), այն , ինչ մենք տեսնում ենք դահլիճում` նույնպես հետաքրքիր պատկեր է: Մեր խնդիրն այն է, որ կարողանանք համեմատել, իսկ դրանք չեն համընկնում»:
Ձայն խնդրեց նաեւ ՀՀԿ-ական պատգամավոր Մանվել Բադեյանը. «Պատգամավորը պիտի մտածի ուրիշին հարգելու մասին, իրա վրա չվերցնի բերդի նադզերատելի ֆունկցիա, եւ մեզ դնի հանցագործի տեղ: Ես ինձ վիրավորված եմ զգում, խնդրում եմ ինձ չվիրավորել: Կարող եք համեմատել եւ եթե բողոք ունեք` բողոքեք: Էս ի՞նչ ա, իրանց նշանակել են բերդի պե՞տ, չեմ սիրում ես, բերդի պետ չեմ սիրում ես»:
Նաիրա ՄԱՄԻԿՈՆՅԱՆ
