«Լեռնային Ղարաբաղի… հարցի լուծման հիմնական խոչնդոտ է այն, որ Հայաստանը գրավել է ադրբեջանական տարածքի զգալի մասը»,- այս հարցն էր օրեր առաջ ավստրիական Der Standard թերթն ուղղել Հայաստանի ԱԳ նախարար Էդվարդ Նալբանդյանին: Եվ ի պատասխան նա մասնավորապես ասել էր. «Ի պատասխան Ադրբեջանի ագրեսիայի Ղարաբաղի ինքնապաշտպանության ուժերը ժողովրդի ֆիզիկական ապահովությունը երաշխավորելու նպատակով, ստիպված էին անվտանգության բուֆերային գոտի ձեւավորել Ղարաբաղի շուրջը»:
ՀՅԴ բյուրոյի Հայ դատի եւ քաղաքական հարցերի գրասենյակի պատասխանատու Կիրո Մանոյանի համար վերոհիշյալ հարցում հնչած ձեւակերպումը ոչ վրիպակ է, ոչ էլ՝ դիվանագիտական քայլ: «Պարզ է, որ իշխանությունների համար տարածքները վերադարձնելու հարց կա: Դրա համար էլ, նախարարը հարցի շտկում չի կատարել: Մադրիդյան սկզբունքները տարածք վերադարձնելու մասին է: Սա անտեսում չէր, այլ քաղաքական կեցվածք»,- Aravot.am-ին ասաց պարոն Մանոյանը:
Նա հիշեցրեց, որ Հայաստանի նախագահ Սերժ Սարգսյանը դեռ պաշտպանության նախարար եղած ժամանակ էր հայտարարել, թե ո՞վ է ասել, որ Աղդամը հայկական տարածք է. «Տարածքները վերադարձնելու մասին է խոսում: Նախարարի պահվածքը զարմանալի չէ, ոչ էլ նորություն: Նման պահվածքը նորմալ չէ»:
Aravot.am-ն այս կապակցությամբ պարզաբանում խնդրեց նաեւ ԱԳ փոխնախարար Շավարշ Քոչարյանից. «Ծանոթ չեմ, չեմ կարող մեկնաբանել: Ես կնայեմ, առանց բառացի տեսնելու չեմ մեկնաբանի»
Կարդացեք նաև
Արփինե ՍԻՄՈՆՅԱՆ
