ԱԺ պատգամավոր, ՀՀԿ անդամ Հովհաննես Սահակյանը «Հայացք» ակումբում իր այսօրվա ասուլիսում ՀԱԿ-ին համեմատեց «Տիտանիկ»-ի հետ, որն աչքի էր ընկնում շքեղությամբ, սակայն վատ նավավարի պատճառով խորտակվեց: Նա թերահավատություն հայտնեց՝ հակառակ բոլոր հարցումների արդյունքների, որ ՀԱԿ-ը կարող է հայտնվել խորհրդարանում: Հովհաննես Սահակյանը վստահեցրեց, որ ՀԱԿ-ի շանսերը, որ կային երկու տարի առաջ, այսօր երկու անգամ նվազել են: Ըստ պատգամավորի` այս կարծիքն իր մոտ ձևավորվել է` դատելով ՀԱԿ-ի առաջնորդի ելույթներից, ՀԱԿ հանրահավաքներին հասարակության մասնակցության նվազումից, ՀԱԿ-ից հեռացած կուսակցություններից և այս կառույցի ներսում գոյություն ունեցող անհամաձայնություններից:
ՀՀԿ խմբակցության պատգամավորը նաև վստահեցրեց, որ ՀՀԿ-ն «այլևս այն միամիտը չէ, որ ենթարկվի ՀԱԿ–ի պրովոկացիաներին»: Aravot.am-ի հարցին` այդ ե°րբ է ՀՀԿ-ն միամիտ եղել, պարոն Սահակյանը պատասխանեց. «Դա ես ասում եմ կես–կատակ: Ուղղակի այժմ մենք ունենք այն ներուժը, կազմակերպչական այն մեխամիզմները, գործողությունների պլանը, որ թույլ չտանք ՀԱԿ–ին ստվեր գցել հետընտրական պրոցեսների վրա: Իսկ նախկինում, երբ հանրահավաքներն ակտիվ փուլում էին, շեշտադրումներն այլ էին: Շատ էին արհեստական խնդիրներ առաջ քաշվում կախված այն բանի հետ, թե ճանապարհների փակ լինելու պատճառով մարզաբնակ հայրենակիցները չեն կարողանում մասնակցել ՀԱԿ հանրահավաքներին: Բայց հիմա այդպես չէ»: Մեր այն դիտարկմանը, թե ՀԱԿ-ի վերջին հանրահավաքի «պատվին էլ» ճանապարհները փակվեցին, ԱԺ պատգամավորը պատասխանեց. «Ձեզ կարող եմ հավաստիացնել , որ որևէ ճանապարհ փակ չի եղել այս անգամ, ես ինքս եկել եմ: Այդ ինչպե°ս է, որ ՀԱԿ–ը մի բան ասում է, դուք բոլորդ հավատում եք, մենք ասում ենք ` չեք հավատում»:
Տաթև ՀԱՐՈՒԹՅՈՒՆՅԱՆ
