ՀԱԿ անդամ, Երեւանի նախկին քաղաքապետ Վահագն Խաչատրյանն այսօր չկամեցավ գնահատական տալ այլ քաղաքական ուժերի համամասնական ցուցակներին` «Ամեն կուսակցություն իր սկզբունքերն ունի, որով կազմում է ցուցակը»: Իսկ ՀԱԿ ցուցակի մասին ասաց. «ՀԱԿ ցուցակն ինձ բավարարելու է, չեմ կասկածում, որ արժանի մարդիկ են լինելու, քանի որ Լեւոն Տեր-Պետրոսյանի վրա է դրված ցուցակը կազմելու գործը»:
«Առավոտի» հարցին` ՀԱԿ-ում դժգոհություններ չկայի՞ն ցուցակի հետ կապված, կարծես նեղացածներ, դուրս եկողներ եղան, պարոն Խաչատրյանը պատասխանեց.«Հնարավոր չէր էդքան արժանի մարդկանց մեջ դժգոհություններ չլինեին: Միակ տարբերակը, որ դժգոհություններ չլինեին` պետք է ռեյտինգային անցկացվեր, բայց դա հնարավոր չէր»:
Ըստ պարոն Խաչատրյանի` ցուցակները կազմվել են որոշակի սկզբունքով, հաշվի են առնվել քաղբանտարկյալ լինելը, քաղաքական գործունեությունը, քաղաքական փորձը եւ այլն: Սակայն ամենագլխավոր սկզբունքը եղել է այն, որ իրենք խնդրել են ցուցակը Լեւոն-Տեր Պետրոսյանը կազմի` «Այդ բեռը դրել ենք նրա ուսերին»:
Կարդացեք նաև
Մելանյա ԲԱՐՍԵՂՅԱՆ
