Օրերս համացանցում հայտնվեց մի տեսանյութ, որտեղ պատկերված է, թե ինչպես է Սյունիքի մարզպետ Սուրիկ Խաչատրյանը՝ Լիսկան, ծեծում գործարար Սիլվա Համբարձումյանին։ Անցած տարի տեղի ունեցած այս դեպքի ւսռթիվ ԶԼՄ-ների բարձրացրած աղմուկից հետո մի կերպ քրեական գործ հարուցեցին, հետո «պարզեցին», որ դա չի կարելի որակել որպես ծեծ, եւ Լիսկայի նկատմամբ որեւէ քրեական հետապնդում չիրականացվեց։ Երեկ, կառավարության շենքի նախասրահում որոշեցինք ՀՀ արդարադատության նախարար Հրայր Թովմասյանից մի փոքր իրավական խորհոդատվություն ստանալ։
– Պարոն Թովմասյան, եթե ես հիմա դուրս գամ փողոց, ու մի որեւէ կնոջ ոտքով խփեմ, հետո բռունցքով խփեմ դեմքին, իմ նկատմամբ քրեական հետապնդում կիրականացվի՞:
– Նայած թե ինչպես խփես։
– Խփեմ ճիշտ այնպես, ինչպես տեսանյութում Լիսկան է խփել Սիլվա Համբարձումյանին։
Կարդացեք նաև
– Չեմ տեսել։
Ասաց նախարարը ու արագ հեռացավ:
Երեկ հրապարակվեց ՀՀԿ համամասնական ցուցակը, եւ մեզ շատ էր հետաքրքրում, թե որ տեղում է հայտնվել Լիսկան։ Խնդիրն այն է, որ նախնական ցուցակում, երբ վերը նշված տեսանյութը համացանցում դեռ չկար, Լիսկան զբաղեցնում էր 73-րդ հորիզոնականը։ Հետաքրքիր էր, թե ինչպես է փոխվել նրա տեղը ցուցակում այդ տեսանյութը հրապարակվելուց հետո։ Կարո՞ղ եք կռահել։ Ճիշտ է, նա բարձրացել է 60-րդ հորիզոնական։ Այսինքն, եթե ապացուցվի, որ դու կնոջն իսկապես խփել ես, ՀՀԿ-ից ես, մարզպետ ես, մականունավոր ես, ապա քո արժեքը ՀՀԿ-ում մեծանում է միանգամից 13 կետով։ Ախր շաատ իրավական ենք։
Հայկ ԳԵՎՈՐԳՅԱՆ
«Հայկական ժամանակ»
