Հայտնի է, որ Ռուբեն Հայրապետյանը ի սկզբանե մտադրություն չուներ կրկին պատգամավոր դառնալու: Այդ մասին նա բազմիցս է հայտարարել: Սակայն, ի վերջո, նա առաջադրվեց իր հայրենի` Ավանի տարածքում: Պարզվում է, պատճառն այն է, որ «Ինձ հասավ տեղեկություն, որ Լեւոն Տեր–Պետրոսյանն էր ուզում այստեղ դնել իր թեկնածությունը: Ես դրա համար դրեցի, որ ցույց տամ, թե ով է Լեւոն Տեր–Պետրոսյանը: Բայց ինքը որ իմացավ ես դրել եմ՝ վախեցավ, չդրեց»:
Պարոն Հայրապետյանն անդրադարձավ նաեւ ի պատասխան Լեւոն Տեր-Պետրոսյանին բանավեճի հրավիրելու իր առաջարկին` Aravot.am-ին ՀԱԿ խոսնակի ասածին, թե Ռուբեն Հայրապետյանը ռազբորկաների է կարող մասնակցել: Նա ասաց. «Տարիներ շարունակ Լեւոն Տեր–Պետրոսյանը շփվել է ինձ հետ, իր տղային է ուղարկել ինձ հետ շփվելու: Եթե դա ռազբորկա է եղել, ուրեմն` բանավեճն էլ է ռազբորկա: Ուղղակի այդ մարդը չունի այդքան ազնվություն, որ իր լեզվանի աշակերտներին ասի, թե տարիներ շարունակ ինձ հետ ինչ «ռազբորկաներ» է արել»:
Լրագրողի հարցին` կա՞ քաղաքական գործիչ, որը պետք է ամաչի ձեզ հետ շփվելուց, պարոն Հայրապետյանը պատասխանեց.«ՀԱԿ–ը ծերից ծեր պիտի ամաչի` ինձ տեսնելուց»: Այդ դեպքում ինչպե՞ս եք պատկերացնում Ազգային ժողովում միասին աշխատանքը` հարցին պատասխանեց.«Պատկերացնում եմ, որ ամոթխած կգան, կմտնեն, կգնան կնստեն»:
Մելանյա ԲԱՐՍԵՂՅԱՆ
