«Քվեարկեք անկաշկանդ՝ ինչպես խորանի առաջ մոմ վառելիս, քվեախցում ազնիվ եղեք»,- այսօր Եղվարդում ՀԱԿ-ի նախընտրական քարոզչության ժամանակ այսպիսի կոչ էր անում նախկին զինդատախազ Գագիկ Ջհանգիրյանը: Նրա խոսքերով՝ «Երբ դուք պոմիդոր եք առնում, պոմիդոր վաճառողի հետ ջերմ հարաբերությո՞ւն եք ունենում: Պարզ է, չէ՞, որ հետո էդ պոմիդոր վաճառողի ճակատագիրը ձեզ քիչ է հետաքրքրում: Ձեզ հետ այդպես են վարվելու»:
Ելույթ ունեցան նաեւ ՀՀՇ վարչության նախագահ Արամ Մանուկյանը, Հրանտ Բագրատյանը: Արամ Մանուկյանը նշեց, որ «պառլամենտում մի 60 դեպուտատ կա, որ տառերը չգիտի: Մեր շրջապատում դուք գիտեք մարդիկ չկա՞ն, որ ասում են՝ Լֆիկը լավ տղա ա, Նեմեցն արժանի ա, մարդիկ էնքան միամիտ են ու մտավոր հետամնաց, որ մտածում են՝ էդ փողը վերցրել են՝ բարոյական չի իրենց ձայն չտալը: Իմ ընտրատարածքում մի հատ դուքանչի կա, 4 կուսակցություն է փոխել»:
Հրանտ Բագրատյանն էլ եղվարդցիներին տեղեկացրեց, որ երեկ Շիրակի մարզում ՀՀԿ-ն գյուղերում մասսայական 10 հազար դրամ ընտրակաշառք է բաժանել. «Եթե թոշակը 30 հազար չլինի, թամահ կկանգնե՞ն էդ տասը հազարին»: Հրանտ Բագրատյանն անդրադառնալով վարչապետ Տիգրան Սարգսյանին ու նրա վարած տնտեսական քաղաքականությանը, ասաց. «Տիգրան Սարգսյանը նույն Միկիտան Սաքոյի կերպարն է: Ում անունը Սաքո է, թող չնեղանա»:
Հռիփսիմե ՋԵԲԵՋՅԱՆ
