Եվրախորհրդի խորհրդարանական վեհաժողովի բյուրոյի նախընտրական դիտորդական առաքելության պատվիրակության հետ ԱԺ «Ժառանգություն» խմբակցությունից հանդիպեցին ղեկավար Ստյոպա Սաֆարյանը եւ խմբակցության անդամ Արմեն Մարտիրոսյանը, առաջիկա խորհրդարանական ընտրություններին «Ժառանգություն» կուսակցության հետ միասին մասնակցող «Ազատ դեկոկրատներ» կուսակցության անդամներ Անուշ Սեդրակյանը եւ Արմեն Առաքելյանը:
Ըստ ԱԺ պաշտոնական կայքի՝ ԵԽԽՎ պատվիրակության ղեկավար բարոնուհի Էմմա Նիքոլսոնը շնորհակալություն հայտնելով հանդիպման համար` տեղեկացրեց, որ մայիսի 3-4-ը Հայաստան կժամանեն 30 հոգուց բաղկացած ԵԽԽՎ դիտորդական առաքելության անդամները:
Բարոնուհու խնդրանքով «Ժառանգություն» եւ «Ազատ դեմոկրատներ» կուսակցությունների ներկայացուցիչները պատվիրակությանը ներկայացրեցին ընտրական գործընթացներին առնչվող եւ իրենց մտահոգող հարցերը:
Մասնավորապես, ըստ Ստյոպա Սաֆարյանի` ընդդիմադիր դաշտում գործող կուսակցությունները գտնվում են մրցակցային անհավասար դաշտում, քանի որ իշխանության ձեռքին են գտնվում վարչական ռեսուրսները: Նրա կարծիքով` բարեգործության անվան տակ հատկապես գյուղական համայնքներում բաժանվում են տարբեր նվերներ: «Ազատ դեմոկրատներ» կուսակցության անդամ Անուշ Սեդրակյանը նշեց, թե իրականացվում են, այսպես ասած` քողարկված ընտրակաշառքներ, երբ որոշակիորեն թանկ ապրանքը վաճառվում է համեմատաբար ցածր գնով:
Կարդացեք նաև
Ըստ «Ժառանգություն» խմբակցության ներկայացուցիչների` նախընտրական շրջանում, ինչպես նաեւ բուն ընտրությունների օրը տեղի են ունենում բռնարարքներ, ուռճացվում են ընտրական ցուցակները:
Անդրադառնալով մեծամասնական համակարգով կայանալիք ընտրություններին` Ստյոպա Սաֆարյանը նկատեց, որ այս դաշտում եւս ընդդիմադիր թեկնածուները հանդիպում են դժվարությունների: Դրանցից է, օրինակ, նախընտրական շտաբի համար տարածք վարձակալելու հարցը: Ըստ նրա` տարածքների տերերը հրաժարվում են դրանք վարձակալության հանձնել ընդդիմադիր թեկնածուներին:
ԵԽԽՎ պատվիրակության ղեկավարը կարծիք հայտնեց, որ նմանօրինակ խնդիրներ առկա են ողջ աշխարհում, ուստի այդ իմաստով Հայաստանը բացառություն չէ:
Բարոնուհի Էմմա Նիքոլսոնը «Ժառանգություն» եւ «Ազատ դեմոկրատներ» կուսակցությունների ներկայացուցիչներին խնդրեց գրավոր իրեն տրամադրել ներկայացված մտահոգություններն ու հարցերը, որպեսզի մայիսին Հայաստան ժամանող ԵԽԽՎ դիտորդական առաքելության անդամներն առավել հստակ պատկերացնեն բոլոր խնդիրները:
ԵԽԽՎ նախընտրական դիտորդական առաքելության պատվիրակությունը հանդիպեց նաեւ ՀՅԴ խմբակցության պատգամավորների հետ:
Խմբակցության ղեկավար Վահան Հովհաննիսյանը շնորհակալություն հայտնեց խորհրդարանական ընտրություններին հետեւելու պատրաստակամություն հայտնած պատվիրակության անդամներին` հույս հայտնելով, որ նրանց դիտորդական առաքելությունը կհաջողվի ու արդյունավետ կլինի:
Վահան Հովհաննիսյանը, խմբակցության պատգամավորներ Լիլիթ Գալստյանն ու Արծվիկ Մինասյանը ներկայացրին նախընտրական փուլի եւ բուն ընտրությունների վերաբերյալ իրենց մտահոգությունները: Որոշ հանգամանքներով պայմանավորված` պատգամավորները վերապահումով են վերաբերվում ազատ եւ արդար ընտրություններ անցկացնելու հնարավորությանը: Լիլիթ Գալստյանի կարծիքով` սոցիալ-տնտեսական վիճակը եւ աղքատության բարձր ցուցանիշը խոցելի են դարձնում քաղաքացուն ազատ ընտրելու եւ արտահայտվելու հարցում: Պատգամավորը պատճառներից մեկը համարեց նաեւ քաղաքական մշակույթի բացակայությունը, երբ ընտրություն է կատարվում ոչ թե գաղափարախոսությունից ելնելով, այլ տարբեր չափանիշներով առաջնորդվելով: ՀՅԴ պատգամավորները մտավախություն հայտնեցին վարչական ռեսուրսների հնարավոր օգտագործման, քարոզչական անհավասար պայմանների, անձնագրերի հավաքագրման` իրենց հասած լուրերի վերաբերյալ:
Զրուցակիցներն անդրադարձան նաեւ ընտրություններին վերաբերող այլ խնդիրների, խոսվեց միասնական շտաբ ձեւավորելու անհրաժեշտության եւ ջանքերը համատեղելով ընտրությունները վերահսկելու արդյունավետության մասին: Վահան Հովհաննիսյանը նկատեց, որ իրենց նախաձեռնած «Քվեն ուժ է» հասարակական շարժումը բաց է բոլորի համար եւ կարող է համագործակության լավ հարթակ դառնալ: Այդուհանդերձ` ՀՅԴ-ն քաղաքական այլ ուժերի հետ համագործակցում է նաեւ երկու կառույցում` ԱԺ նախագահին կից մոնիթորինգային խմբում եւ ընդդիմադիր ուժերի ու «Բարգավաճ Հայաստան» կուսակցության հետ միասնական շտաբում:
Խմբակցության անդամները կարեւորեցին դիտորդների երկարաժամկետ եւ մեծաքանակ ներկայությունն ընտրական փուլում` ժողովրդավարական չափանիշերին համապատասխան ընտրություն անցկացնելու համար:
ԵԽԽՎ բյուրոյի նախընտրական դիտորդական առաքելության պատվիրակության հետ ԱԺ «Բարգավաճ Հայաստան» խմբակցությունից հանդիպեցին Նաիրա Զոհրաբյանը եւ Վահե Էնֆիաջյանը:
ԲՀԿ քաղաքական խորհրդի անդամ եւ ԱԺ եվրոպական ինտեգրման հարցերի մշտական հանձնաժողովի նախագահ Նաիրա Զոհրաբյանը ներկայացրեց իրենց կուսակցության աշխատանքը թե քարոզարշավի նախապատրաստական փուլում, թե քարոզարշավի ընթացքում: Նա նշեց, որ ԲՀԿ-ն մասնակցում է ընտրությունների ազատ եւ արդար ընթացքը վերահսկող թե խորհրդարանական եւ արտախորհրդարանական ընդդիմության հետ ձեւավորված ձեւաչափի, թե ԱԺ նախագահին կից ստեղծված մոնիթորինգային խմբի, թե պատգամավոր Դավիթ Հարությունյանի նախաձեռնության աշխատանքներին:
Անդրադարձ եղավ տարբեր քաղաքական ուժերին ու ԲՀԿ-ին մտահոգող ընտրացուցակների խնդրին, այդ առիթով մամուլում եղած հրապարակումներին, մեկ հասցեում մի քանի տասնյակից ավելի գրանցումներին, կրկնակի անձնագրերի վերաբերյալ հրապարակումներին: Տիկին Զոհրաբյանը տեղեկացրեց, որ ընտրացուցակները ԲՀԿ տարածքային կառույցներում մանրամասնորեն ճշգրտվում են հրապարակման օրվանից, որի վերաբերյալ միջազգային դիտորդներին համապարփակ տեղեկատվություն կներկայացվի աշխատանքն ամփոփելուց հետո:
