Ադրբեջանահայերն այս ընտրություններին չեն սատարի ոչ մի ուժի. այս մասին հայտարարեց Ադրբեջանահայերի ասամբլեայի նախագահ Գրիգորի Այվազյանը: Նա պարզաբանեց. «Ոչ մի ուժ չի կիսում մեր գաղափարները: Մենք մեր խնդիրների լուծման ակնկալիքով դիմել ենք բազմաթիվ ուժերի, սակայն ոչ մի արձագանք: Մեր վիճակը ողբալի է: 25 տարվա ընթացքում ադրբեջանահայերի սոցիալ-տնտեսական խնդիրների լուծման առումով ոչ մի բան չի արվել»: ՀՀ-ում ապրում է 360 հազար ադրբեջանահայ, այսինքն ՝բնակչության 10 տոկոսը: Գ. Այվազյանը նշեց, որ տարբեր քաղաքական ուժերի կողմից իրեն հրավեր է եղել նրանց ցուցակում հանդես գալ: Սակայն նա հրաժարվել է հետևյալ պատճառով. «Չեմ ցանկացել, քանի որ հասկացել եմ, որ հանդես եմ գալու որպես խամաճիկ, կամակատար»:
Գ. Այվազյանը, դառնալով ներկայիս քաղաքական գործընթացներին, նկատեց. «Քաղաքական թեժ պահը դեռ առջևում է: Թող ընտրությունները սկսվեն, ավարտվեն, դժգոհություն առաջանա, միտինգները սկսվեն, մեկ էլ տեսար Ղարաբաղը թուրքի ոտքի տակ է, այն մտել է Զանգեզուր: Մենք կոչ ենք անում չմոռանալ, որ մեր թշնամին միշտ արթուն է, նրանց նպատակը մեկն է՝ ոչնչացնել հայերին: Մեզնից է կախված՝ այդ հարցում նրանց կօգնենք, թե ոչ»:
Դառնալով Գեորգի Վանյանին՝ ասաց. «Վրդովված եմ այդպիսի իրավիճակից, փառատոնից և կեղծ հայրենասիրական վայնասունից, քանի որ հայրենասիրությունը այդպես չեն բարձրացնում: Եթե ասում է, որ ղարաբաղցի է, ուրեմն մեր ազգը խայտառակում է»:
Aravot.am-ը պարոն Այվազյանից հետաքրքրվեց՝ վերջին օրերին զինծառայողների հետ կապված միջադեպերի վերաբերյալ ՀՀ պաշտոնական դիրքորոշումն իրենց գոհացնու՞մ է: Պարոն Այվազյանը պատասխանեց. «Ինչպես կարող է մեզ գոհացնել, եթե մեր կոշտ դիրքորոշումը ոչ ոք չի ուզում հաշվի առնել: Ադրբեջանին խաղաղություն հաստատելու կոչ ենք անում, այն պարագայում, երբ Ադրբեջանն այդ խաղաղությունը չի ուզում, իսկ խաղաղությունը կարող է լինել միայն երկկողմ: Եթե քեզ հետ շախմատ են խաղում, դու նրանց հետ ֆուտբոլ մի խաղա»:
Կարդացեք նաև
Տաթև ՀԱՐՈՒԹՅՈՒՆՅԱՆ
