Մայիսի 7-ին հերթական անգամ չի կայացել Իջեւան համայնքի ավագանու նիստը: Ինչպես տեղեկացանք Իջեւանի քաղաքապետ Վարդան Ղալումյանից՝ քվորում չի եղել, ավագանու 15 անդամից նիստին ներկա է եղել 7-ը: Քվորում ապահովելու համար նիստին ավագանու 8 անդամ պետք է ներկայանար:
Առանց լուրջ պատճառաբանությունների նիստերին չներկայացող ավագանու անդամների թվում կան մարզպետարանի ենթակա պետական հիմնարկների տնօրեններ: Տավուշի մարզպետ Արմեն Ղուլարյանը ցանկության դեպքում կարող էր ապահովել նրանց ներկայությունը: Հիշեցնենք, որ մարզպետ Ա. Ղուլարյանը ՀՀԿ Տավուշի մարզային կառույցի ղեկավարն է, իսկ քաղաքապետ Վարդան Ղալումյանը ԲՀԿ անդամ է:
Տավուշի մարզկենտրոն Իջեւանը մարզի 62 համայնքներից միակն է, ուր ավագանին չի հաստատել 2012 թվականի բյուջեն:
Մայիսի 31-ին լրանում է Իջեւանի ավագանու ընտրության մեկ տարին: Իջեւանի քաղաքապետ Վարդան Ղալումյանն ասաց, որ մտադիր է մայիսի 31-ից հետո դիմել դատարան՝ անհիմն կերպով նիստերից բացակայող ավագանու անդամների լիազորությունները դադարեցնելու պահանջով:
Կարդացեք նաև
Ոսկան ՍԱՐԳՍՅԱՆ
