Հարևան պետություններից մեկում ծնված, մեծացած և ընդամենը վերջերս Հայաստան եկած երկու երիտասարդ հրկիզել են Ծոմակի DIY ակումբը, ինչի կապակցությամբ ոմն Կարեն Հակոբյան ոչ ավել ոչ պակաս հայտարարեց, որ «մենք ֆաշիստական հասարակություն ենք դարձել», «մենք ֆաշիստական մտածողություն ունեցող ազգ ենք», որն իմ գնահատմամբ վիրավորում և նվաստացնում է մեր ազգային արժանապատվությունը:
ՀՀ Ազգային ժողովի փոխնախագահ, ՀՀԿ խոսնակ Էդուարդ Շարմազանովն էլ իր հերթին հայտարարեց, որ միանգամայն ճիշտ ու արդարացված է համարում երկու հայ երիտասարդների ընդվզումը (այսինքն DIY ակումբի հրկիզումը) մեր երկրում այլասերության որջ ստեղծած եւ հասարակությունն իր բարոյական արժեքներից հեռացնելու նպատակ ունեցող համասեռամոլների դեմ:
Հիմա ինչ, եթե վաղը մեկը էդ Կարեն Հակոբյանին մի հատ ապտակի էն բանի համար, որ մեզ ֆաշիստական ազգ ու հասարակություն է անվանում, պետք է հայտարարեն, որ միասեռականի է՞ ապտակել:
Ինչ վերաբերում է Ազգային ժողովի փոխնախագահի և իշխող կուսակցության` ՀՀԿ-ի խոսնակի մակարդակով արված հայտարարությանը, որն ըստ էության միասեռականների նկատմամբ անհանդուրժողականության և նրանց նկատմամբ հանցագործությունների կատարումն արդարացնող կոչ է, կարծում եմ, պետք է համապատասխան գնահատականի արժանանա ոչ միայն քաղաքացիական հասարակության, այլ նաև ՀՀԿ-ի և այլ քաղաքական ուժերի, ինչպես նաև ՀՀ անվտանգության խորհրդի կողմից:
Կարդացեք նաև
Վերջում հիշեցնեմ, որ անհանդուրժողականությունն է ծնում անհանդուրժողականություն, ատելությունն է ծնում ատելություն: Ակտիվացած միասեռականներ, պետք չէ ատել մեր ազգն ու հասարակությունը և սիրել ու գովերգել, օրինակ, թուրքական հասարակությանը: Ազգայնականներ, պետք չէ նման անհանդուրժողականություն ցուցաբերել միասեռականների նկատմամբ: Վերջ ի վերջո, ձեր մեջ էլ այդպիսիները քիչ չեն, հավանաբար:
Կարեն Մեժլումյան
փաստաբան
