Այսօր «Press Master» մամուլի ակումբում Արամ Խաչատրյանի ծննդյան օրվան ընդառաջ՝ կոմպոզիտորի անվան տրիոյի մասնակիցներ՝ ջութակահար Կարեն Շահգալդյանը եւ դաշնակահար Արմինե Գրիգորյանը ներկայացրին «Դասական երաժշտության զարգացման հիմնադրամի» շրջագայություններն ու առաջիկա ծրագրերը:
Արմինե Գրիգորյանը նշեց, որ տրիոն մարտ-ապրիլ ամիսներին համերգներով հանդես է եկել Ռուսաստանի 6 եւ Լատվիայի 2 քաղաքում: «Մարտի 30-ին «Գաֆեսճեան արվեստի կենտրոնում» կկայանա «Երաժշտական ճամփորդություն» խորագրով համերգային-գովազդային ծրագիր, որը էքսպերիմենտալ բնույթ է կրում: Քանի որ առջեւում արձակուրդներ են, կցուցադրվեն տարբեր երկրներից եւ Հայաստանից տեսաշարեր՝ կենդանի կատարմամբ զուգահեռ հնչեցնելով տարբեր կոմպոզիտորների եւ Խաչատրյանի ստեղծագործությունները»,- հայտնեց Արմինե Գրիգորյանը:
Արամ Խաչատրյանի ծննդյան օրը՝ հունիսի 6-ին, տրիոն պատրաստվում է հնչեցնել կոմպոզիտորի ինչպես հանրահայտ, այնպես էլ քիչ կատարված գործերը, իսկ հունիսի 10-13-ը հիմնադրամը համերգներ եւ վարպետության դասեր կանցկացնի Սյունիքում: Ա. Գրիգորյանը համաձայն չէ այն կարծիքի հետ, թե մարզերում դասական երաժշտություն չեն լսում. «Մեր գնալուն միշտ սիրով են սպասում, դահլիճները լեփ-լեցուն են լինում: Համագործակցում ենք տեղի երաժշտական դպրոցների եւ ուսումնարանների հետ»:
Կարեն Շահգալդյանը նշեց, որ համերգները բարեգործական են եւ կազմակերպվում են հիմնադրամի ֆոնդը հովանավորողների տրամադրած միջոցներով. «Սերը դասական երաժշտության հանդեպ նման է տիեզերական նավի հանդեպ ունեցած սիրուն. սիրում ես, բայց դա քեզ հասանելի չէ: Ներկայումս տաղանդավոր երեխաներ են սովորում երաժշտական դպրոցներում եւ ուսումնարաններում, սակայն նրանց հետագա զարգացումն էլ պետք է ֆինանսավորել»: Ջութակահարը հավելեց, որ որոշ երկրներում դասական երաժշտությունը, կարելի է ասել, պետքական չէ, սակայն նույնը չենք կարող ասել Հայաստանի պարագայում, սակայն մեզ մոտ էլ մանկավարժ-մասնագետների պակաս կա:
Կարդացեք նաև
Ա. Գրիգորյանը հավելեց, որ ժամանակին չէր գործում Վանաձորի երաժշտական դպրոցի թավջութակի դասարանը, մինչդեռ կոնսերվատորիա գալիս էին սովորելու հիմնականում Վանաձորից. «Բայց հիմնադրամի ջանքերով արդեն մեկ տարի է, ինչ բացվել է դասարանը»:
Նշենք նաեւ, որ այս տարի լրանում է «Գայանե» բալետի 70-ամյակը, ինչի առիթով Ա. Խաչատրյանի տուն-թանգարանը նախատեսում է հանդիպումներ կազմակերպել բալետի բեմադրիչների հետ եւ հրատարակել լուսանկարչական ալբոմ:
Լուիզա ՍՈՒՔԻԱՍՅԱՆ
