Aravot.am-ը ՀՔԴՄ կուսակցության նախագահ, ԱԺ ՀՀԿ խմբակցության պատգամավոր Խոսրով Հարությունյանի հետ զրույցում հետաքրքրվեց՝ ինչպես է վերաբերում ՀԱՊԿ-ի դիրքորոշմանը վերջին օրերին իրականացված Ադրբեջանի դիվերսիոն գործողությունների կապակցությամբ: Պարոն Հարությունյանին հիշեցրինք Ստեփան Սաֆարյանի այն դիտարկումը, թե ՀԱՊԿ-ի պահվածքը թույլ է տալիս եզրակացնել, որ «այս ամենից հոտ չի գալիս, որ ՌԴ-ն ՀՀ-ի ռազմաքաղաքական գործընկերն է»: Խ. Հարությունյանը պատասխանեց. «Ոչ ՀԱՊԿ-ը, ոչ նրա վեհաժողովը, ի վերջո ոչ էլ Ռուսաստանն այս դիվերսիոն գործողությունները չեն դիտում արտառոց մի բան 1994-ից հետո: Եվ այն, որ ՌԴ-ն կատարվածին արձագանքում է Լուկաշևիչի շուրթերով, նշանակում է, որ չեն ուզում այս միջադեպին մեծ կարևորություն տալ:Իրականում անհամեմատ ավելի բարդ իրավիճակներ են եղել, երբ հրետանին է աշխատել: Նույնիսկ ամերիկյան վերլուծաբաններն են ասում, որ լայնամասշտաբ գործողությունները բացառվում են, քանի որ կա ՀԱՊԿ հասկացությունը»:
Իսկ այն կարծիքը, թե այս միջադեպը ինչ-որ առումով կարելի է ՀԱՊԿ-ի փորձարկում համարել, Խ. Հարությունյանն այսպես է մեկնաբանում. «Թող ինձ ներեն, բայց ռազմաքաղաքական գործընկերության իմաստը փոքրամասշտաբ, մանր-մունր գործողություններին արձագանքելը չէ, այլ ամբողջ տարածաշրջանը կայուն, խաղաղ զարգացման հարթության վրա պահելն է: Եթե ամեն մի մանր-մունր գործողության արձագանքես, վաղը ձեր խոսքի գինն ու կշիռը էապես կարժեզրկվի: Որևէ ակնարկ չի կարող լինել, որ մեր ռազմավարական գործընկերությունը Ռուսաստանի հետ կանգնած է փորձության առաջ և չի դիմանում այդ փորձությանը»:
Տաթև ՀԱՐՈՒԹՅՈՒՆՅԱՆ
