«Սովորաբար տոն օրերին թերությունների կամ պրոբլեմների մասին չեն խոսում, բայց ես կարծում եմ, որ հենց այս օրերին, երբ նշում ենք Սահմանադրության օրը, մենք պետք է կրկին անդրադարձ անենք, որ, այո՛, մեր երկրի հիմնական օրենքը լավն է և ճգնաժամային իրավիճակներում իր կենսունակությունը շատ դեպքերում ցույց է տվել: Բայց մենք պիտի հասնենք նրան, որ յուրաքանչյուր քաղաքացի հասկանա, որ ինքն օրենքից բարձր չէ: Այս խնդիրը մենք պիտի կարողանանք լուծել մեր մենթալիտետում»,-«Փաստինֆո» գործակալության թղթակցի հետ հարցազրույցում ասաց ԱԺ եվրոպական ինտեգրման հարցերի մշտական հանձնաժողովի նախագահ, «Բարգավաճ Հայաստան» խմբակցության քարտուղար Նաիրա Զոհրաբյանը:
Ըստ պատգամավորի, ամեն տարի, երբ հուլիսի 5-ին տոնում և կարևորում ենք Սահմանադրությունը, անձամբ ինքը միշտ փորձում է գնահատել` արդյո՞ք մեր օրենքն իրապես բոլորի համար է գերակա. «Ցավոք սրտի, ամեն անգամ արձանագրում եմ, որ մեր երկրի պրոբլեմը օրենքների ու Սահմանադրության չկատարումն է: Կան և շարունակում են լինել խավեր, սոցիալական խմբեր, մարդիկ, անհատներ, որոնք իրենց վեր են դասում օրենքից և Սահմանադրությունից»:
«Ահա սրա շուրջ մենք պետք է բողոքենք, սրա շուրջ ընդվզենք, և սրա շուրջ էր նաև
«Հարսնաքար»-ի դեպքի հետ կապված ընդվզումը, որ կան մարդիկ, որոնք կարծում են, որ իրենք անպատժելի են, որոնք կարծում են, որ իրենք օրենքից դուրս են»,-ընդգծեց նա` հավելելով, որ շատ ուրախ է տեսնել, որ Հայաստանում կա քաղաքացիական հասարակության զարթոնք: «Դա իրապես մեր ամենամեծ ձեռքբերումը կարելի է համարել, և հենց այդ քաղաքացիական հասարակության պոզիտիվ ճնշումը կարող է բերել նրան, որ մեր երկրում օրենքն իրապես լինի գործող»,-նշեց Ն. Զոհրաբյանը:
Կարդացեք նաև
«ՓԱՍՏԻՆՖՈ» գործակալություն
